Pas aksionit të disa ditëve më parë, Policia e Shtetit është rikthyer në kampin e muxhahedinëve në Manzë të Durrësit.
Që në mëngjes herët, efektivë të shumtë u stacionuan në hyrje të kampit, duke kontrolluar te gjitha automjetet që hynin drejt kampit, si dhe ato që dilnin prej andej. Kontrolle u ushtruan edhe tek personeli që është i punësuar në këtë kamp, kryesisht banorë të zonës që kryejnë shërbime të ndryshme.
9 ditë më parë, me vendim të Gjykatës së Posaçme, Policia e Shtetit ushtroi kontroll në ambientet e kampit të MEK, kontroll që nxiti reagimin e banorëve të kampit, sidomos në momentin kur agjentët hynë në zyrat ku ndodheshin serverët dhe filluan të sekuestronin pajisjet kompjuterike.
SPAK njoftoi së kontrollet u zhvilluan në kuadër të luftës kundër sulmeve kibernetike dhe terrorizmit, dhe vijnë pas hetimeve që nisën për sulmet me të cilat u përball vendi një vit më parë.
