Liderët botërorë u takuan në Delhi për ditën e dytë dhe të fundit të samitit të G20-ës. Në këtë samit u diskutuan disa tema, por fokusi ishte lufta në Ukrainë. Presidenti turk, Rexhep Tayip Erdogan kërkoi te plotësohen pjesërisht kërkesat e Rusise si dhe të lehtësohen sanksionet ndaj saj, në mënyrë që të rikthehet marrëveshja e grurit.
Asnjë proces që margjinalizon Rusinë në nismën e grurit nuk do të jetë i zbatueshëm,” u tha Erdogan gazetarëve pas mbylljes së samitit të G20. Ai gjithashtu njoftoi një takim të ardhshëm për këtë çështje midis përfaqësuesve nga Rusia, Ukraina dhe Kombet e Bashkuara, pa specifikuar një datë apo vendndodhje të saktë.
Një tjetër hap pozitiv ishte dakordesimi për deklaratën e përbashkët. Por edhe pse me konsensusin e të gjitha vendve anëtare te G20, deklarata duket se sërish shkaktoi pakënaqësi. Ministria ukrainase e punëve të jashtme reagoi duke thënë se samiti nuk ka asgjë për tu krenuar sa i takon agresionit rus. Një përfaqësues i diplomacise ukrainase publikoi nje pjesë të deklaratës duke zëvendësuar fjalët qe në fakt tërthorazi i referohen Rusisë.
Po ashtu Presidenti i Shteteve të Bashkuara, Joe Biden, dhe aleatët e tij njoftuan planin për një korridor të transportit detar dhe hekurudhor, i cili do ta lidhte Indinë me Lindjen e Mesme dhe Evropën e qe pritet ta ndryshojë tregtinë globale.
Projekti do te përfshijë Shtetet e Bashkuara, Arabinë Saudite, Emiratet e Bashkuara Arabe, Bashkimin Evropian dhe vendet e tjera të G20, tha Jon Finer, zëvendëskëshilltari për Siguri Kombëtare i Bidenit. Korridori i transportit detar dhe hekurudhor do të mundësonte tregti më të madhe mes vendeve. Ai mund të jetë, po ashtu, njëri prej projekteve më ambicioze kundër programit masiv të Kinës për infrastrukturën, përmes të cilit ajo ka synuar t’i lidhë më shumë pjesë të botës me ekonominë e saj.
Samiti shënohet nga mungesa e Vladimir Putin të Rusisë dhe Xi Jinping të Kinës, ndërsa është larguar edhe presidenti amerikan, Joe Biden. Dita e parë dhuroi momente mjaft pozitive, duke përfshirë anëtarësimin e përhershëm të Bashkimit Afrikan në G20.
India njoftoi gjithashtu se u arrit një konsensus për një deklaratë të përbashkët që do të miratohej në fund të samitit. Kjo arritje e madhe u përshëndet nga Britania e Madhe, Shtetet e Bashkuara të Amerikës, dhe shumë vende të tjera.
Ukraina ka thënë se është e zhgënjyer nga deklarata, e cila nuk e përmend Rusinë dhe as nuk e kritikon drejtpërdrejt për luftën. Kryeministri indian Narendra Modi ia dorëzoi presidencën e G20-ës, presidentit te brazilit, Lula da Silva. Ky i fundit garantoi se nuk do të arrestohet presidenti rus Vladimir Putin, nëse do të marrë pjesë në samitin e radhës në Brazil.
