Për të tretën herë partia demokratike tenton që të kalojë në parlament një ligj për lustracionin.
Nënkryetari i PD Oerd Bylykbashi ka depozituar sot në kuvend një draft, i cili synon që për një periudhë 5-vjeçare asnjë person që ka qenë anëtar i byrosë politike, anëtar i komitetit qendror , i presidiumit të kuvendit popullor, hetues e prokurorë e gjyqtarë në gjyqe politike, anëtarë të ish-sigurimit të shtetit apo bashkëpunëtore, të mos kenë më të drejtë të zgjidhen apo emërohen deputetë, kryetarë bashkie, ministra, prokurorë a gjyqtarë.
OERD BYLYKBASHI
NENKRYETAR, PD
“ne e depozitojmë me qëllim që në funksionet drejtuese të shtetit shqiptarë dhe në një seri funksionesh tjera publike të rëndësishme, funksionarët e lartë politikë të partisë së punës, drejtuesit e aparatit të dhunës, pra të Ministrisë së Brendshme, të hetuesit, prokurorisë, gjykatës, të sigurimit të shtetit dhe bashkëpunëtorët e sigurisë së shtetit që kanë kryer aktivitet duke dhunuar të drejtat e shqiptarëve të mos jenë më në funksion të tyre.”
Ligji në thelb është ai i vitit 2008, por është rregulluar në përputhje me vendimin e gjykatës kushtetuese që e rrëzoi asokohe.
Bylykbashi ka shfrytëzuar parashikimet kushtetuese për dekriminalizimin për të hartuar draftin e lustracionit.
“Tashmë me ndryshimet që iu bënë për pastërtinë e figurës, për të larguar kriminelët nga parlamenti është e njëjta bazë kushtetuese e cila vlente që në atë kohë për të lustracionin.”
Ndërkaq Bylykbashi e ka bërë të qartë se partia demokratike nuk e mbështet nismën e Enkelejd Alibeajt për hapjen e plotë të dosjeve.
“Të gjitha ato propozimet e tjera që janë aty vetëm për të krijuar një zhurmë, apo për të goditur kundërshtarët politikë janë të pambështetëshme.”
Nga ana tjeter PD nuk mbështet as nismën e PS që prek Ilir Metën, që të verifikohen edhe njëherë të gjithë politikanet që e kanë kaluar njëherë vetingun për lidhje me ish-sigurimin e shtetit nga komisionet Mezini e Bezhani.
Drafti i PD parashikon që vetëm gjykata e lartë ka të drejtë të kryejë riverifikimin e këtyre personave.
Por drafti i PD vështirë të merret parasysh përsa kohë që mazhoranca ka deklaruar se nuk diskuton asnjë nisëm të Sali Berishës.
“Të shohim nëse do të vazhdojë të jenë mbrojtësit e flaktë të krimit të komunizmit siç kanë qenë deri më sot.”
Aktualisht ne parlament po diskutohen dy nisma që gëzojnë mbështetjen e PS dhe grupit Alibeaj, e para për hapjen e plotë të dosjeve, e dyta që autoriteti të hetojë sërish ata politikanë që janë kontrolluar në vitet 90’.
