Situata në Himarë është qetësuar pas zjarrit të fuqishëm që shpërtheu mbrëmjen e djeshme, rreth orës 20:00, në kodrat përreth qytetit. Flakët, të favorizuara nga erërat e forta dhe temperaturat e larta, u përhapën me shpejtësi duke rrezikuar banesa, hotele dhe sipërfaqe të mëdha me ullinj.
Për shkak të terrenit të vështirë dhe përmasave të zjarrit, në ndihmë të zjarrfikësve të Himarës u angazhuan forca nga bashki të ndryshme të vendit. Në operacion morën pjesë rreth 300 forca, mes tyre zjarrfikës dhe efektivë të Forcave të Armatosura, të cilët punuan për izolimin dhe shuarjen e flakëve.
Sipas banorëve të zonës, dëmet e shkaktuara janë të konsiderueshme. Mbi 6 mijë rrënjë ullinj shekullorë janë përfshirë nga flakët, ndërsa janë dëmtuar edhe gjashtë banesa, tre prej të cilave ishin të braktisura. Banorët e kanë cilësuar situatën si një prej zjarreve më të mëdha të regjistruara në zonë gjatë dekadave të fundit.
Nënkryetari i Bashkisë Himarë, Pervin Gjikuria, i cili ndoqi nga afër operacionin për izolimin e flakëve, ka folur për momentet e vështira të përjetuara gjatë natës. Falë ndërhyrjes së forcave zjarrfikëse dhe Forcave të Armatosura, zjarri është izoluar dhe situata është qetësuar, por strukturat vijojnë të qëndrojnë në gatishmëri. Rreziku mbetet ende i pranishëm për shkak të vatrave të nxehta dhe materialeve të djegura që mund të favorizojnë rindezjen e flakëve. Autoritetet u bëjnë thirrje banorëve të tregohen të kujdesshëm, ndërsa forcat në terren vijojnë monitorimin e zonës.
/vizionplus.tv
