Rritja e çmimit të naftës ka sjellë pasojat e para në ekonomi, jo vetëm në Shqipëri por në të gjithë botën.
Vendimi i vendeve të OPEC për të ulur prodhimin e naftës, vjen si pasojë e një aleance të fshehtë mes tyre dhe Rusisë. Kështu ka deklaruar eksperti i ekonomisë Albert Gajo, gjatë një interviste në edicionin e lajme në Vizion Plus me moderatorin Roland Zili.
Gajo tha se ky vendim është marrë për të dëmtuar vendet që mbështesin Ukrainën.
“Janë dy veçori të ndryshme të rritjes së çmimit të energjisë elektrike dhe të naftës. Nëse për energjinë elektrike metodologjia e BE e lidh rritjen e çmimit, me rritjen e çmimit të gazit, me naftën kemi një aspekt tjetër.
Kemi një aleancë në heshje të vendeve të OPEC me Rusinë për të vënë në vështirësi vendet e NATO-s, sepse dhe vendimi i fundit i OPEC ishte për t’i dhënë një mbështeje Rusisë dhe për të vënë në vështirësi ekonomike vendet që mbështesin Ukrainën në këtë lloj lufte”, tha Gajo.
Eksperti i ekonomisë, tha se qeveria në një mënyrë ose në një tjetër do të lejojë rritjen e çmimit të naftës, pasi varet nga tregjet e huaja, ndërsa për energjinë tha se janë duke pritur dimrin e lagësht, që të mos rritet çmimi që është aktualisht.
“Pasojat janë në kosto. Në prodhimin e produkteve dhe shërbimeve të caktuara që lidhen drejt për drejt me këto dy produkte shumë të rëndësishme për biznesin, siç janë karburanti dhe energjia elektrike.
Qeveria në një mënyrë ose në një tjetër do kërkojë të lehtësojë këtë lloj barre. Për të dyja rastet qeveria do ndjekë rrugë të ndryshme. Për karburantet do lejojë rritjen e çmimit dhe nuk parashikoj që të marrë masa, por mesa kuptohet ajo do rrisë subvencionet për grupe të caktuara interesi siç ka paralajmëruar për peshkatarët, fermerët apo grupe të tjera. Por do prekë një masë të vogë në krahasim me popullatën.
Me rritjen e çmimeve të ardhurat që vijnë nga TVSH dhe taksat janë të rritura. Qeveria do mundohet të presë një dimër të lagësht dhe të mos rrisë çmimin e energjisë dhe ta mbështesë çmimin aktual me prodhimin vendas që ka kosto më të ulët.
Çmimet e karbiranteve në Shqipërikanë qenë të mbingarkuara me taksa, të cilat i mbledh qeveria. Këto taksa nuk shkojnë për ato që mblidhen”, tha ai.
