Një ngjarje e rëndë është raportuar mesditën e sotme në një hotel në zonën e Orikumit, në Vlorë, ku një grup prej më shumë se 10 personash dyshohet se kanë shkuar për t’i vendosur gjobë pronarit të hotelit, Vasil Bedinaj.
Ngjarja ka ndodhur rreth orës 12:30. Sipas informacioneve paraprake, personat fillimisht kanë kërcënuar me fjalë pronarin, ndërsa më pas dyshohet se kanë përdorur edhe armë, duke i kërkuar një shumë prej 5 milionë eurosh.
Mes palëve dyshohet se ka pasur edhe një konflikt fizik. Pas ngjarjes, personat janë larguar nga ambientet e hotelit, ndërsa në vendngjarje kanë mbërritur menjëherë shërbimet e Policisë, të cilat kanë nisur ndjekjen e tyre.
Gjatë ndjekjes, dy persona që udhëtonin me një automjet janë aksidentuar në urën e Peshkëpisë, në hyrje të Vlorës.
Të plagosurit janë transportuar me ambulancë drejt spitalit për të marrë ndihmë mjekësore. Sipas të dhënave paraprake, njëri prej tyre ka pësuar dëmtime të shumta në shpinë dhe në shtyllën kurrizore, ndërsa personi tjetër ka marrë dëmtime si pasojë e aksidentit.
Ndërkohë, forca të shumta policie janë shpërndarë në disa zona të qytetit të Vlorës, ndërsa vijojnë kontrollet për identifikimin dhe kapjen e personave të përfshirë në ngjarje.
Policia po vijon hetimet për të zbardhur rrethanat e plota të ngjarjes, ndërsa të dhënat e deritanishme mbeten paraprake.
/vizionplus.tv
