Meta arrin marrëveshje jashtë gjykate me 18-vjeçaren që akuzoi Instagramin për varësi dhe probleme të shëndetit mendor

Meta, kompania mëmë e Instagramit dhe Facebook-ut, ka arritur një marrëveshje jashtë gjykate me një 18-vjeçare, e cila e kishte paditur me pretendimin se platformat ishin projektuar për të krijuar varësi, duke i shkaktuar probleme të shëndetit mendor dhe çrregullime të të ushqyerit.

Termat e marrëveshjes me të renë, të identifikuar me inicialet K.D.B., nuk janë bërë publikë. Javën e kaluar, Meta arriti marrëveshje edhe me një tjetër paditëse, 16-vjeçaren S.J. Si rrjedhojë, gjyqi që pritet të nisë në Los Anxhelos do të vijojë vetëm kundër Snap Inc., kompanisë mëmë të Snapchat.

Dy të rejat pretendonin se kishin nisur të përdornin YouTube që në moshën 3-vjeçare dhe platformat e tjera që në moshën 9-vjeçare, duke zhvilluar zakone kompulsive për shkak të funksioneve si riprodhimi automatik i videove dhe lëvizja e pafundme në ekran. Kompanitë i kanë kundërshtuar akuzat, duke deklaruar se kanë ndërmarrë masa për sigurinë e përdoruesve të mitur.

Në një çështje të mëparshme, në mars, një juri gjykate vendosi se Meta dhe YouTube kishin vepruar me neglizhencë dhe caktoi 6 milionë dollarë dëmshpërblim për një të re.

Ndërkohë, në gusht, Meta arriti marrëveshje me vlerë afro 18 miliardë dollarë me pothuajse të gjitha shtetet dhe territoret e SHBA-së për t’i dhënë fund proceseve ligjore lidhur me dëmet e pretenduara ndaj të rinjve. Kompania ra dakord gjithashtu të ndryshojë mënyrën e funksionimit të Instagramit dhe Facebook-ut për adoleshentët.