Zëdhënësi i Presidencës, Tedi Blushi ka reaguar pas thirrjes së Ambasadës së SHBA-së drejtuar shtetasve të saj që të kenë kujdes më 2 mars.
Përmes një postimi në “Facebook”, Blushi shprehet se nuk ka asnjë arsye për t’u alarmuar, ndërsa shtoi se manifestimit do t’i bashkohen edhe mbi 200 shqiptaro-amerikanë. Po ashtu, ai pohoi se Meta ka pritur në takim drejtuesit e lartë të Policisë së Shtetit, duke konfirmuar bashkëpunimin maksimal për mbarëvajtjen e rubimit në mbrojtje të Kushtetutës.
“Asnjë alert për datën 2 mars, për qytetarët shqiptarë dhe të huaj që jetojnë dhe do të mbërrijnë në Tiranë! Përkundrazi, jemi shumë të lumtur që këtij Manifestimi madhështor Mbarëkombëtar do t’i bashkohen edhe mbi 200 shqiptaro-amerikane, të cilët na kanë konfirmuar pjesëmarrjen në 2 mars dhe një pjesë e të cilëve sapo kanë mbërritur në Atdhe. Dhe me të drejtë, sepse për liritë dhe vlerat amerikane, ata nuk mund t’i marrin leje as Rilindjes dhe as ndonjë segmenti të Sigurimit të Shtetit, kudo që ai të ndodhet!”
Blushi konfirmoi se manifestimi do të zgjasë dy orë, me flamuj kuqezi dhe mimoza. Ai tha se shtetasve të huaj që do të marrin pjesë do t’iu dhurohet një degë mimoze dhe një Kushtetute e Shqipërisë.
“Çdo detaj është i mirëpërcaktuar me kohë. Manifestimi fillon në ora 17.00, me flamuj kuqezi dhe mimoza në duar, e përfundon në ora 19.00. Godina e Kryeministrisë dhe Ministrisë së Brendshme do të mbrohen nga aktivistë të identifikuar. Shtetasve të huaj, veçanërisht atyre shqiptaro-amerikanë???? që do të marrin pjesë do t’u dhurohet një degë mimoze dhe një Kushtetute e Shqipërisë, e votuar me 140 vota dhe me bekimin e Komisionit të Venecias, SHBA-ve dhe BE-së. Alerti i vetëm i 2 marsit, është për puçistët që tallen me Kushtetutën dhe sovranitetin e popullit shqiptar duke miratuar apo bekuar pabesisht ligje anti-kushtetuese! Të gjithë më 2 mars për Kushtetutën dhe kundër grushtit të shtetit. Për Shqipërinë dhe sovranitetin e popullit shqiptar! Zoti e bekoftë miqësinë e palëkundur shqiptaro-amerikane! Pa Kushtetutë nuk ka demokraci! Pa demokraci nuk ka Shqipëri!”
