Të paktën dymbëdhjetë persona u vranë të dielën në një sulm të armatosur kundër një feste të organizuar nga të rinjtë në qytetin Salvatierra, në shtetin Guanajuato, në Meksikën qendrore, njoftuan autoritetet lokale.
“Për momentin, dymbëdhjetë njerëz janë të vdekur”, tha zyra e Prokurorit të Përgjithshëm në Guanajuato, e cila është ndër shtetet meksikane me problemet më të rënda të krimit të dhunshëm ndërsa bandat e fuqishme përleshen për territor.
Autoritetet thanë gjithashtu se rreth dhjetë persona u plagosën, të cilët u dërguan në spitale.
Sipas mediave meksikane, masakra ka ndodhur në vilën San Jose del Carmen, e cila zakonisht jepet me qira për pushime. Zona, ku u dogjën edhe automjetet, u rrethua nga forcat e sigurisë, zbuloi një korrespondent i AFP.
Një person që ishte në festë, i cili kërkoi të mos përmendet, tha se në vendngjarje mbërritën gjashtë persona të armatosur dhe filluan të qarkullojnë mes të rinjve që morën pjesë në festë.
“Duke qenë se nuk ishin të ftuar, kur shkuam të pyesnim se kush ishin, filluan të qëllonin”, shtoi ky dëshmitar okular, duke sqaruar se festën e kishin organizuar një grup miqsh në pritje të Krishtlindjes.
“Viktimat ishin të gjithë të rinj që i njihnim, njerëz të mirë. Ajo që po ndodh në Salvatierra është një tmerr”, tha Carlos Silva, një anëtar i fondacionit Terra Negra, i cili promovon projekte sociale, përmes Facebook.
Nuk është e qartë nëse sulmuesit i përkasin ndonjë prej bandave që veprojnë në Guanajuato. /vizionplus.tv
