Kandidati i PD për Lezhën, Mark Marku deklaroi se Partia Demokratike nuk do t’i njohë kurrë këto zgjedhje. Duke falënderuar demokratët për votëbesimin në Lezhë, Marku tha se beteja e PD do të vijojë. Sipas tij, fitoren Edi Ramës ja siguruan paratë e hedhura për të blerë vota.
“Si drejtues politik i qarkut bashkë me kolegët ju falenderoj përzemërsisht dhe ju garantoj se do të jemi në lartësinë e gjestit tuaj fisnik. Shumë prej jush me lot në sy, sot më kanë shprehur deshpërimin për faktin se ajo që nuk ndodhi në Lezhë apo diku tjetër ndodhi në Shqipëri. Paratë që u janë vjedhur juve nga qeveria më e korruptuar në botë, pra nga Rama, dhe llumi i krimit na i vodhën zgjedhjet në shkallë vendi. Ju garantoj se Partia Demokratike nuk do ti njohë kurrë këto zgjedhje, dhe do punojë që shumë shpejt pushteti nga duart e bandës grabitëse të Rilindjes të kalojë tek populli. Jam i bindur se SHBA, BE dhe gjithë bota demokratike nuk do ta njohin Lukashenkon e Ballkanit, Edi Rama dhe zgjedhjet e tij.”
Në Qarkun e Lezhës PD e fitoi garën me socialistët, duke marrë 4 mandate.
