Kryeministri Edi Rama ka publikuar mëngjesin e kësaj të mërkure një video, ku shfaqet kandidatja për deputete e PS-së, inxhinierja Luljeta Bozo, e cila shprehet se do të angazhohet për të përmirësuar gjendjen e pensionistëve dhe për t’i aktivizuar në disa probleme shoqërore, ku ata mund ta ndiejnë veten të dobishëm.
Një tjetër fushë që Bozo ka si prioritet është fusha e kërkimit shkencor.
“Gjënë më të shtrenjtë kam kohën, se po të iku koha nuk rikuperohet. Në 1965 mbarova studimet në fakultetin e Inxhinierisë, u diplomova inxhiniere ndërtimi, meqënëse isha me rezultate shumë të mira më mbajtën direkt në universitet, kam 56 vjet që punoj pa ndërprerje. Librin e parë e kam nxjerrë në vitin 1975. Në vazhdimësi deri sot kam bërë gati 35 libra të botuar. Çohem shumë herët 4:30-5:00 dhe menjëherë bëj një ecje 5 kilometra, ky është regjimi ditor i ushtarit. Për moshën që kam them që kam akoma për të përmirësuar pak gjendjen e pensionistëve dhe për t’i aktivizuar në disa probleme shoqërore ku ata do ta ndiejnë veten shumë mirë dhe shumë të dobishëm për shoqërinë. Fushën e dytë që kam si prioritet është fusha e kërkimit shkencor, kjo do të jetë e bashkëngjitur me fushën e arsimit të lartë se s’mund të zhvillohet arsimi i lartë pa kërkimin shkencor.”
