Festivali Internacional i Muzikës në edicionin e 9-të të tij në Korçë mbrëmjen e së shtunës i ndal në Polin e Eventeve në Drenovë. kjo natë bëri bashkë balerinë të njohur shqiptarë e të huaj që janë pjesë e trupave europiane. Shfaqja u mbyll me organizatoren e këtij festivali Inva Mulën, duke sjellë kështu emocione të forta për të pranishmit e shumtë në fshatin turistik te Drenovës.
“Romntizimi në skenë, kur është arti romantik është sublim. Një nga netët me të bukura në MIK FESTIVAL pasi ishte kulmi i baletit botëror. Zgjedhja e gjithë numrave ishte fantastike”, tha Inva Mula, soprano.
Për një pjesë të mire të artistëve një koncert i tillë në natyrë ka qenë befasi e madhe për ta.
“Shumë e bukur, u kënaqëm, publiku u kënaq, ne dhamë maksimumin. Artiste shqiptare e të huaj. Të gjithë nga e njëjta shkollë”, u shpreh Anbeta Toromani, koreografe
“Natë magjike, e paimagjinueshme. Shpresoj të keni ndierë gëzimin tonë. Mund të interpretojmë në vendin tonë të lindjes. Uroj të vij akoma më shpesh. Luaja në violincele e dëgjoja zogjtë”, deklaroi Juliana Laska, violonçeliste
“Është hera e parë në Shqipëri për mua, ishte një eksperiencë fantastike. U kënaqa shumë. Skena në natyrë ishte e mrekullueshme”, shtoi Irene Savary, balerinë
“Ishte magji e vërtetë, qershi mbi tortë për baletin. Kënaqësi të ndaja skenën në Korçë me artiste te tjerë. Unë mendoj se Shqipëria e shqiptarët janë ambasadoret me të mirë për vlerat e këtij vendi”, tha Adela Muçollari, soliste e parë në TKOB.
MIK Festival mbyllet sot me dy koncerte, njërin në kishën e Shën Kolllit në Hoçisht, e tjetri i cili i dedikohet serenatave korçare në Parkun Rinia në Korçë.
