Në qarkun e Elbasanit bashkia e Belshit vijon të mbetet e para që nga viti në vit po njeh një hov sa i takon turizmit. Qindra vizitorë, vendas dhe të huaj e kanë kthyer Belshin ndër destinacionet e preferuara.
Edhe ne këto ditë të nxehta nuk kanë munguar turistët e huaj që kanë zgjedhur të kalojnë disa orë në Belsh.
“Unë vij nga Izraeli dhe për Belshin kam dëgjuar 8 vite më parë gjatë një udhëtimi që kam bërë për të shkuar në Berat. Ne kaluam nga Belshi dhe që atëherë çdo udhëtim timin e bëj nga Belshi. Unë udhëtoj shumë nëpër Ballkan por Shqipëria ka kaq shumë për të treguar. Ajo që më pëlqen më shumë këtu janë njerëzit. Njerëzit dinë të respektojnë. Unë kam qenë 32 herë këtu dhe mund të vij edhe 100 herë të tjera pasi gjithnjë bëhet më mirë”.
“Shqipëria është shumë e bukur pak ndryshe nga Kanadaja! Është më mediterrane por është shumë e bukur”.
Edhe guidat turistike nga e gjithë Shqipëria po e fusin Belshin në listën e destinacioneve për tu vizituar.
Nga ana tjetër të dhënat e bashkisë së Belshit për numrin e turistëve tregojnë për një trend pozitiv.
Belshi është një qytet që zhvillon turizmin në të 4 stinët e vitit duke u kthyer në një promotor të rëndësishëm të ekonomisë, por edhe zhvillimit në qarkun e Elbasanit.
