Sekretari amerikan i Shtetit, Marco Rubio, deklaroi se negociatat për të përfunduar luftën në Ukrainë janë përqendruar kryesisht tek statusi territorial i Donetskut, i cili mbetet çështja më e vështirë për t’u zgjidhur. Ai tha se, edhe pse ka ende dallime të mëdha, tani pjesa më e madhe e diskutimeve është përqendruar në këtë një çështje kryesore.
“Është ende një urë për t’u kaluar. Hendeku mbetet, por të paktën i kemi çuar çështjet e hapura në një pikë kyçe, e cila ndoshta do të jetë shumë e vështirë”, tha ai.
Presidenti rus Vladimir Putin ka deklaruar se Rusia synon të marrë kontrollin e plotë të rajonit të Donbasit, ku forcat ruse aktualisht kontrollojnë rreth 90% të Donetskut.
Moska kërkon nga Kievi të dorëzojë pjesën e mbetur, rreth 5.000 km², por Ukraina ka theksuar se nuk do të japë territore që nuk janë nën kontrollin e Rusisë. Shumica e komunitetit ndërkombëtar e konsideron Donetskun pjesë të Ukrainës, ndërsa Putin e quan atë një pjesë të “tokave historike” të Rusisë.
Rubio njoftoi gjithashtu se SHBA mund të përfshihen në raundet e ardhshme të negociatave, megjithëse përfaqësuesit e administratës Trump, Steve Whitkoff dhe Jared Kushner, që morën pjesë në raundin e fundit në Abu Dhabi, nuk do të marrin pjesë.
Raundi i fundit i bisedimeve, që përfshinte kontakte direkte midis zyrtarëve rusë dhe ukrainas, përfundoi pa një marrëveshje, por të dyja palët shprehën gatishmërinë për të vazhduar dialogun. Shtetet e Bashkuara kanë bërë të qartë se çdo garanci sigurie për Ukrainën do të jetë e lidhur me nënshkrimin e një marrëveshjeje paqeje me Rusinë.
