Si çdo 12 shtator demokratët nderuan kujtimin e Azem Hajdarit. Rastësia solli që në këtë 19-vjetor të vrasjes së tij, Rudina Hajdarit, e bija e themeluesit të PD-së, të mbajë fjalimin e parë në Kuvend, si ligjvënëse.
Njëri pas tjetrit, Lulzim Basha dhe Sali Berisha, risollën në vëmendje luftën e Azem Hajdarit për demokraci. Fatet të së cilës, sipas tyre janë ende të kërcënuara.
Por as kryeministri Edi Rama nuk ka munguar të përcjellë mesazhin e tij. “Kënaqësi që sot në sallën e Kuvendit, karrigia e Azem Hajdarit nuk është më bosh! I uroj të bijës të jetë një zë i denjë i brezit të saj”, shkruan Rama në facebook.
Në ceremoni u vu re mungesa e disa prej ish-figurave kryesore të PD-së, si Jozefina Topalli apo Astrit Patozi, kundërshtarë të linjës politike të kryetarit Basha.
