Mes thatësirës, erërave të forta dhe temperaturave të larta, Greqia fqinje po vijon luftën ndaj zjarreve që kanë përfshirë vendin që prej një jave.
Zonat më të vështira mbeten në rajonin verilindor, afër qytetit të Aleksandropolit dhe në atë qendror, në malin Parnithë pranë kryeqytetit.
Zjarret kanë lënë 20 të vdekur gjatë javës së fundit 18 prej të cilëve emigrantë, përfshirë dy të mitur të moshave 10 deri në 15 vjeç.
Trupat e tyre u gjetën pranë një barake në një zonë pyjore të djegur pranë Aleksandoupolit në Greqinë verilindore. Më shumë se gjashtëdhjetë banorë të zonave të prekura dhe zjarrfikës kanë mbetur të lënduar.
Zjarret në këtë zonë shkatërruan dhjetëra banesa dhe detyruan evakuimin e qindra banorëve, përfshirë edhe pacientët e spitalit të qytetit.
Në verilindje të Greqisë, deri më tani janë më shumë se 730km katrorë sipërfaqe të djegura, ndërsa zjarri i Aleksandoupolis është konsideruar si më i madhi i regjistruar ndonjëherë në BE.
Po ashtu në periferi të Athinës, flakët dogjën parkun kombëtar në malin Parnithë një nga zonat e fundit të gjelbëruara të kryeqytetit. Vetëm në dy ditët e fundit janë djegur 5900 hektarë.
Autoritetet kanë deklaruar se për një pjesë të zjarreve, përgjegjës është dora e njeriut dhe në total janë arrestuar 142 persona. 118 prej të cilëve për zjarrvënie nga pakujdesia dhe 24 të tjerë me dashje.
Gjermania, Suedia, Kroacia, Qiproja kanë dërguar avionë, ndërsa dhjetëra zjarrfikës dhe automjete rumunë, francezë, çekë, bullgarë, shqiptarë dhe sllovakë po luftojnë së bashku me forcat greke në terren.
