Finalja e Europa League do të jetë Roma-Sevija. Ky është verdikti i dalë nga duelet e kthimit gjysmëfinale, ku më së shumti vëmendja ishte e përqendruar në Spanjë, aty ku Sevia nxori jashtë Juventusin. Pas barazimit 1 me 1 në ndeshjen e parë, dueli në Ramon Sanchez Pizuan ishte shumë i fortë, sikurse edhe pritej. Pas një pjese të parë me raste të mira për shënim në të dyja portat, ishin italianët që kaluan të parët në avantazh me anë të Dushan Vlahoviç në minutën e 65, pak pasi serbi ishte future në fushën e lojës. Mirëpo 6 minuta më vonë, një tjetër zëvendësues, Suzo, lëshoi një të majtë të mrekullueshme nga distanca për të shënuar golin e barazimit dhe për ta çuar ndeshjen në shtese për shkak të rezultatit të përgjithshëm 2 me 0.
Në shtesë, ai që u bë hero i andaluzeve ishte argjentinasi Lamela, i cili me kokë shënoi golin e dytë për Sevijen, skuadër që shkon për herë të 7 në histori në finalen e një Europa League, trofe që e ka fituar 6 herë në 6 finalet e luajtura. Ndërkohe Juventus humbet një shans të madh për të fituar një trofe të rëndësishëm, sikurse kupa e dytë për nga rëndësia në kontinent. Mirëpo në finalen e Budapestit do të jetë një tjetër ekip italian, Roma.
Skuadra verdhekuqe shkon në finalen e një kompeticioni europian dy vite radhazi. Ndryshe nga viti i kaluar kur fituan Conference League në Tiranë, këtë herë do të provojnë kundër Sevijes të marrin Europa League, duke e parë si një mundësi për të shkuar përmes këtij trofeu në Champions League sezonin e ardhshëm. Si gjithnjë, Zhoze Murinjo vendos t’i arrijë objektivat në mënyrën e tij, duke u mbrojtur me të gjithë ekipin pas. Kështu ndodhi edhe në Gjermani, kur Roma falë rezultatit 0 me 0 ndaj Leverkusen mbrojti suksesin 1 me 0 të ndeshjes së parë dhe kapi biletën e finales, e cila do të luhet me 31 maj.
