Hamasi thotë se i është përgjigjur planit të armëpushimi të paraqitur nga i dërguari i Presidentit Trump në Gaza, Steve Witkoff.
Në një deklaratë të shtunën, Hamasi tha se “propozimi” i tij për ndërmjetësuesit, Katari dhe Egjipti, “synon të arrijë një armëpushim të përhershëm, një tërheqje gjithëpërfshirëse nga Rripi i Gazës dhe të sigurojë rrjedhën e ndihmës për njerëzit tanë dhe familjet tona në Rripin e Gazës”.
“Si pjesë e kësaj marrëveshjeje, dhjetë të burgosur izraelitë të gjallë të mbajtur nga rezistenca do të lirohen, përveç kthimit të tetëmbëdhjetë trupave, në këmbim të një numri të rënë dakord të të burgosurve palestinezë”, thuhet në deklaratë.
Propozimi i mbështetur nga SHBA-të dhe i miratuar nga Izraeli, i parë nga CNN të premten, përfshin lirimin nga Hamasi të 10 pengjeve izraelite dhe 18 pengjeve të ndjera në këmbim të 125 të burgosurve palestinezë që vuajnë dënime të përjetshme dhe 1,111 banorëve të Gazës të ndaluar që nga fillimi i luftës.
Negociatat drejt një armëpushimi të përhershëm do të fillonin menjëherë në ditën e parë të armëpushimit 60-ditor, sipas propozimit.
Kushtet e marrëveshjes do të lejonin gjithashtu që ndihma humanitare të hynte “menjëherë” në Gaza dhe të shpërndahej “përmes kanaleve të dakorduara”, duke përfshirë Kombet e Bashkuara dhe Gjysmëhënën e Kuqe, sipas propozimit.
Por draft-marrëveshja nuk përmbante asnjë garanci të brendshme për një përfundim të përhershëm të luftës, një kërkesë kyçe e Hamasit, as siguri se armëpushimi do të zgjatet për sa kohë që negociatat vazhdojnë.
Hamasi fillimisht kishte sinjalizuar ngurrim për të pranuar kushtet e marrëveshjes./vizionplus.tv
