Përfaqësuesi i Përhershëm i Shqipërisë në OKB, Ferit Hoxha, në konferencën e parë të presidencës shqiptare në Këshillin e Sigurimit të OKB-së iu përgjigj interesimit të medias për disa çështje, ndër të cilat edhe për qëndrimin lidhur me një paralelizëm mes Donbasit në Ukrainë dhe Kosovës.
I pyetur nëse ka ngjashmëri mes tyre, ambasadori Hoxha tha se “nga pamja e jashtme, ne nuk shohim ndonjë ngjashmëri mes Kosovës si një shtet i pavarur dhe agresionit të paprovokuar rus në Ukrainë dhe republikave të parafabrikuara të Donbasit, për arsyen e thjeshtë sepse nuk ka asnjë lloj ngjashmërie”.
“Dhe për hir të së vërtetës, Kosova nuk ka ngjashmëri me asnjë rast tjetër në botë. Operacioni i NATO-s në 1999-ën pasoi një fushatë intensive diplomatike nga OKB-ja dhe Grupi i Kontaktit, ku Rusia është gjithashtu anëtare. Ka 8 rezoluta të Këshillit të Sigurimit që kanë të bëjnë me Kosovën përpara Rezolutës 1244 që vendosi misionin e UNMIK-ut që është akoma atje. Atëherë, Këshilli i Sigurimit e cilësoi pastrimin etnik në Kosovë dhe refugjatët si një kërcënim i sigurisë dhe misioni i NATO-s i dha fund shkeljeve të rënda të të drejtave të njeriut, vrasjes së civilëve dhe mizorive të dokumentuara. Për më tepër, Gjykata Ndërkombëtare e Drejtësisë vendosi se pavarësia e Kosovës në 1999-ën nuk shkeli ligjin ndërkombëtar. E njëjta gjykata hodhi poshtë pretendimet ruse për genocidin që Ukraina kishte ushtruar kundër minoriteteve ruse në Ukrainë dhe e urdhëronte Rusinë të ndalonte sepse nuk shihte arsye për të mbështetur pretendimin për genocid”, vijoi ambasadori Hoxha.
“Sot ka shumë organizata që mund të merren me ankesat e popullsisë ruse në Ukrainë. Por, Rusia zgjodhi një rrugë tjetër, shkoi në luftë. Së fundi, Kosova nuk është çështje paqeje dhe sigurie; nuk është çështje që duhet të diskutohet, sipas kapitullit 7. Sot, Kosova është çështje që ka të bëjë me ndërtimin e shtetit, performancën e institucioneve dhe me zhvillimin e shoqërisë civile”, theksoi Hoxha.
“E parë nga këndvështrimi i Shqipërisë, vend fqinj i Kosovës, Ballkani Perëndimor është rajon që po zhvillohet me shpejtësi. Ne nuk harrojmë çfarë ndodhi, por ne nuk e kemi ngulitur mendjen në të shkuarën, por shohim drejt të ardhmes, si mund ta bëjmë rajonin të ecë së bashku përpara sipas perspektivës së merituar euroatlantike”, përfundoi ambasadori Ferit Hoxha.
