Sean “Diddy” Combs është përfshirë në listën e dëshmitarëve të mundshëm në gjyqin për vrasjen e reperit legjendar Tupac Shakur. Prokuroria ka lidhur emrin e ish-mogulit të industrisë muzikore me Duane “Keffe D” Davis, 63-vjeçarin që po përballet me akuzat për vrasjen e Tupac.
Diddy, i cili rreth një vit më parë u përball vetë me një proces gjyqësor për akuza të tjera, aktualisht po vuan një dënim prej 50 muajsh burg, pasi u shpall fajtor për transportimin e personave me qëllim prostitucioni.
Gjyqi ndaj Davis ka nisur më 18 gusht në Las Vegas. Prokuroria e paraqiti atë si personin që dyshohet se planifikoi dhe urdhëroi vrasjen e Tupac, edhe pse nuk ishte ai që tërhoqi këmbëzën. Sipas akuzës, motivi lidhej me një përleshje që kishte ndodhur disa orë më parë, ku ishte përfshirë nipi i tij.
Davis akuzohet për vrasje, ndërsa prokuroria po përpiqet të provojë se ai kishte rol në organizimin e sulmit dhe veproi në kuadër të një bande kriminale. Ai është deklaruar i pafajshëm dhe, nëse shpallet fajtor, mund të përballet me burgim të përjetshëm.
Tupac Shakur u qëllua më 7 shtator 1996 në Las Vegas, ndërsa ndodhej në një makinë pas ndeshjes së boksit mes Mike Tyson dhe Bruce Seldon në MGM Grand. Një Cadillac i bardhë iu afrua automjetit ku ndodhej reperi dhe personat brenda hapën zjarr. Tupac, vetëm 25 vjeç, ndërroi jetë gjashtë ditë më vonë si pasojë e plagëve.
Davis, ish-anëtar drejtues i grupit South Side Compton Crips, është i vetmi person i akuzuar zyrtarisht për vrasjen e Tupac Shakur. Përfshirja e emrit të Diddy në listën e dëshmitarëve ka rikthyer në vëmendje pretendimet e bëra ndër vite për lidhjet e tij të mundshme me çështjen, ndërsa procesi pritet të hedhë më shumë dritë mbi atë që ndodhi natën e vrasjes së një prej reperëve më të famshëm të të gjitha kohërave.
/vizionplus.tv
