Policia e Lezhës ka intensifikuar kontrollet ndaj automjeteve luksoze, me fokus evidentimin e mjeteve që dyshohet se mund të jenë përfituar nga veprimtari kriminale.
Gjatë kontrolleve në qytetin e Lezhës, policia ka ndaluar dhe verifikuar një automjet luksoz tip “Rolls-Royce”.
Strukturat e Krimeve Ekonomike dhe Financiare kanë kryer verifikime mbi origjinën e automjetit, historikun e blerjes dhe shitjes, pronësinë, si dhe burimin e të ardhurave me të cilat është blerë.
Në përfundim, automjeti është bllokuar për mungesë dokumentacioni, ndërsa ndaj pronarit, shtetasit me inicialet F. M., banues në Mbretërinë e Bashkuar, ka nisur hetimi pasuror.
Policia bën me dije se kontrollet ndaj automjeteve luksoze do të vijojnë, me qëllim evidentimin e pasurive me burim të dyshuar kriminal dhe goditjen e pastrimit të produkteve të veprimtarive kriminale.
