Ish-deputeti i Partisë Demokratike, Jorida Tabaku u takua këtë të enjte me bizneset tek rruga e Kavajës, të cilët treguan problemet e përditshme.
Disa prej tyre, tha Jorida, kanë votuar dhe mbështetur PS-së në 2013, mirëpo ata tregojnë se janë zhgënjyer.
“E kam votuar dhe e kam përkrahur në 2013. Thjesht ashtu mendoja, thashë me atë të majtë do ecim përpara, por kam 22 vite dhe periudhë më të vështirë nuk kam kaluar ndonjëherë. Ja ku është puna! Gjithë malli i marrë i pashitur për t’u futur në kutia. Gjatë pandemisë mora vetem 260 mijë lekë, ndërsa shpenzime pagova gati 1 milionë e 200 mijë Lekë në muaj. Si kanë ardhur punët, dua nja 3 vjet ta kap veten që të ec më përpara, se vetëm lekë po paguajmë dhe nuk marrim gjë. Këtëj thonë arsimi falas, shëndetësia falas. Vdes nga shëndetësia e tyre. Jo më larg se para 3 ditësh, kishim një vaki, një njeriun tonë të afërm. Më kanë sorollatur spitalit, që unë s’e harroj”, thotë tregtari.
Tabaku i ftoi bizneset që t’i bashkohen ndryshimit në 25 prill, në mënyrë që qeveria të jetë krah individit dhe të kujdeset për mirëqenien e tij.
“Në 5 minuta më the gjithë problemet që ka sot Shqipëria. Kjo është Shqipëria reale! Jo ajo që del nëpër grafikët që nuk ekzistojnë. Ne do të ngrejmë një model dhe sistem ku të vlerësohet puna. Ku të vlerësohet familja, ku të vlerësohet individi që punon dhe të largohemi nga ky modeli sot që mbron dhe vlerëson vetëm kriminelin dhe vetëm shokun e Edi Ramës. Njerëzit si ty e bëjnë Shqipërinë! Ne duam që një i ri që hap biznes të ketë mundësi, të shohë shpresë. Dua që të ngremë një model që ta mbështesim të riun dhe më të mirin.”
