Kreu i PD-së, Sali Berisha, gjatë fjalës së tij para protestuesve të mbledhur para Kryeministrisë, deklaroi se opozita arriti të mbajë premtimin për mbrojtjen e votës.
Ai tha se, falë përkushtimit dhe punës së demokratëve, në raportin e OSBE-së është vërtetuar se zgjedhjet e vitit 2025 ishin një farsë.
Sipas tij, opozita është përballur me një qeveri të korruptuar dhe kriminale.
“Ne përmbushëm një tjetër premtim, mbrojtjen e votës. Falë punës tuaj, falë dokumenteve tona, falë përkushtimit, arritëm që raporti ndërkombëtar i OSBE-së sot të jetë një dokument që fakton se Edi Rama i shndërroi zgjedhjet e vitit 2025 në një farsë të shëmtuar elektorale. Përpjekjet e lobimit korruptiv të tij dështuan plotësisht. Ne, në fakt, këto vite u përballëm si asnjëherë më parë me një qeveri të organizuar kriminale, e kryesuar nga ‘Ramaduro’ i Europës dhe de facto e drejtuar nga klanet më të fuqishme të marijuanës dhe kokainës në Europë dhe në botë. Ne u përballëm këto vite me sundimin e krimit dhe drogës, me urdhrat dhe vendimmarrjet e saj. U përballëm me propagandë që 24 orë në 24 orë trullos shqiptarët”, tha Berisha.
