Pak orë para fillimit të protestës së opozitës, delegacioni BE në Tiranë I ka bërë thirrje liderve opozitarë që të shmangin aktet e dhunës.
Në një deklaratë në “Facebook”, delegacioni i BE thekson se nuk do të tolerojë asnjë akt dhune në çfarëdo lloj rrethane ndërsa I kërkon autoriteteve të policisë që të tregojnë vetëpërmbajtje dhe nëse provokohen.
Duke shprehur shqetëim edhe në lidhje me përplasjet e ndodhura mes policisë e mbështetësve të opozitës në disa rajone të vendit, BE u bën thirrje palëve politike që të tregojnë vullnet dhe të angazhohen urgjentisht në një dialog konstruktiv me qëllim kapërcimin e situatës aktuale.
“Ne e respektojmë dhe e mbështesim plotësisht të drejtën themelore të qytetarëve të Shqipërisë për të demonstruar. Në të njëjtën kohë, vazhdojmë të theksojmë rëndësinë e ushtrimit të kësaj të drejte në mënyrë të rregullt dhe paqësore. Ne jemi të shqetësuar nga episodet e fundit të dhunës që kanë ndodhur në disa rajone të vendit. Asnjë akt i dhunshëm apo formë e nxitjes për dhunë nuk mund të tolerohen në asnjë rrethanë. Është përgjegjësi e drejtpërdrejtë e liderëve të protestës për të siguruar që demonstrimet sonte të mbahen në mënyrë të sigurt si për pjesëmarrësit ashtu dhe për banorët Tiranës, si dhe për të shmangur çdo përshkallëzim gjatë protestave. Përdorimi i eksplozivëve apo i çdo sendi tjetër që mund të shkaktojë lëndime është krejtësisht i papranueshëm. Autoritetet e zbatimit të ligjit gjithashtu kanë përgjegjësinë që të vazhdojnë të veprojnë me përmbajtje, edhe nëse provokohen. Ne vazhdojmë t’i bëjmë thirrje të gjitha palëve për të treguar vullnet të fortë politik dhe për t’u angazhuar urgjentisht në një dialog konstruktiv për të kapërcyer situatën politike aktuale, si dhe për të mbështetur dhe konsoliduar progresin e bërë nga Shqipëria në procesin e reformave.”
