Lideri demokrat, Lulzim Basha ka vijuar me akuzat në drejtim të kryeministrit Edi Rama përmes një videomesazhi ku shprehet se ka rritur varfërinë në vend.
Në një postim në “Facebook”, lideri demokrat teksa ka treguar jetën e një qytetari që sipas tij, ka shitur gjak për të ushqyer familjen, akuzon kreun e qeverisë se po pasuron të pushtetshmit e po varfëron njerëzit e thjeshtë e të pambrojturit.
“Shqiptarët janë sot të varfër sepse janë të vjedhur. Varfëria, papunësia, mungesa e mundësive vijnë nga grabitja që po i bëhet Shqipërisë nga Edi Rama me një grusht klientësh. Paratë tuaja, paratë e shqiptarëve po i vjedh Edi Rama me familjen dhe miqtë e tij. Pasurohen të pushtetshmit dhe të pasurit, varfërohen njerëzit e thjeshtë dhe të pambrojtur. Miliarda euro janë vjedhur, abuzuar dhe shpërdoruar nga Edi Rama këto 6 vjet, të gjitha kanë përfunduar në xhepat e tij ose janë shpërdoruar për tekat e tij në fasada dhe lluks, ndërsa shqiptarët nuk sigurojnë dot bukën e përditshme.”
Basha e akuzon kryeministrin se është artist I mashtrimit pasi çdo gjë që ka premtuar ka qenë, sipas tij, thjesht mashtrim me qëllim grabitjen e qytetarëve.
Sipas Bashës, e vetmja mundësi e shqiptarëve për çlirimin e ekonomisë është ajo e largimit të kryeministrit Rama.
“Shqiptarët janë pa punë, sepse ekonominë dhe mundësitë ekonomike i kanë marrë oligarkët dhe klientët e Edi Ramës. Edi Rama është artist i mashtrimit. Çdo gjë që ka premtuar, cdo gjë që ka thënë ka qenë mashtrim me qëllim për të vjedhur. Çdo projekt, program dhe politike është mashtrim për shqiptarët në shërbim të oligarkëve. Që të çlirojmë ekonominë dhe të hapim vende pune e mundësi për çdo shqiptar, duhet të largojmë Hajdutin Psiqik dhe bandën e tij grabitqare. #HajdutiPsiqik #RamaIk #ShqipëriaSiEuropa
