Një ajsberg gjigand me lartësi prej 100 metrash kërcënon një fshat të vogël në Groenlandë. Mali prej akulli u shkëput disa metra larg bregut duke vënë në rrezik një popullsi prej 160 banorësh.
Dallgë të mëdha janë krijuar si pasojë e akullit që vazhdon të bjerë në ujë.
Autoritetet kanë evakuuar një pjesë të banorëve që jetonin shumë pranë bregut për të shmangur ndonjë fatkeqësi të mundshme, ndërsa policia ka vënë në dispozicion edhe një helikopter kërkim shpëtimi.
Por ajo që ka shqetësuar në masë banorët dhe autoritetet është se një përmbytje e mundshme mund të çaktivizojë termocentralin e fshatit që është në bregdet.
Banorët kanë thënë për mediat se kanë parë vazhdimisht copa akulli të shkëputen nga ajsbergu, por kjo është më e madhja që kanë parë ndonjëherë deri më tani.
Numri i ajsbergëve gjigant që kalojnë përgjatë bregdetit të Groenlandës është rritur gjatë dekadave të fundit si rrjedhojë e ndryshimeve klimatike dhe ngrohjes së ujërave. Por banorët ndihen të kërcënuar për shkak se shkrirja e masivit të akujve po ndodh shumë shpejt, duke rritur rrezikun e përmbytjeve bregdetare.
