BDI ka mbledhur kryesinë për të diskutuar për gjetjen e mënyrave për daljen nga kriza dhe zhbllokimin e situatës në vend. Në të është shqyrtuar mundësia e tërheqjes së ministrave të kësaj force politike nga qeveria teknike, por vendimi do të merret pas konsultimeve me partitë e shumicës parlamentare dhe ekspertët e fushës.
Edhe në rast të marrjes së një vendimi për largim, verifikimi i dorëheqjeve të tyrë është i pamundur. Ahmeti sqaroi se kryesia do të mblidhet sërish javën e ardhshme, ndërsa hodhi poshtë mundësinë e mbajtjes së zgjedhjeve të parakohshme parlamentare, që kërkon VMRO-DPMNE.
“Nuk është zgjidhja më e mirë shkuarja në zgjedhje të parakohshme. Kemi probleme shumë më të rëndësishme. Zgjedhjet e parakohshme nuk do të thotë se ofrojnë një zgjidhje më të mirë dhe ne jemi në kërkim të zgjidhjeve më të mira tani që të dalim nga kjo situatë. Shumë më me rëndësi është të mendohet se sit ë tejkalohet ngërçi për t’u organizuar zgjedhjet lokale”.
Edhe gjatë të premtes deputetët e VMRO-DPMNE mbajtën sërish të bllokuar punimet e kuvendit të Maqedonisë, që deri tani ka dështuar të zgjedhe kryetarin e ri të tij. Bashkimi Evropian vazhdon të shprehë shqetësimin për situatën politike në Maqedoni. Ambasadori Samuel Zhbogar tha se BE-ja këmbëngul në formimin e shpejtë të qeverisë që të vijojë reforma.
