Një ngjarje e pazakontë ka ndodhur në Athinë, ku një 89-vjeçar ka shkaktuar alarm dhe tension në zyrat e EFKA-s në Kerameikos dhe më pas në Gjykatën e Apelit, duke u përballur tashmë me akuza të shumta penale.
Sipas deklarimeve të tij para policisë, i moshuari tha se kishte dalë nga shtëpia me një valixhe dhe kishte planifikuar një udhëtim me taksi drejt Patras, ndërsa më pas kishte ndryshuar disa herë destinacionin gjatë lëvizjeve të tij në qytet.
Lexo edhe :
“Doja të shkoja në gjykatë sepse ndjeva se nuk kisha të drejtë. Nuk doja të vrisja askënd. Nëse do doja, do ta kisha bërë, por e bëra për hir të parave sepse nuk mendoj se po marr atë që meritoj,” deklaroi ai, duke shtuar se qëllimi i tij ishte të tërhiqte vëmendje për problemet e tij me EFKA-n.
Ai pretendoi gjithashtu se kishte menduar të udhëtonte jashtë Greqisë, madje deri në Strasburg, për të protestuar për çështjen e tij.
Akuza të rënda penale
Prokuroria e Athinës ka ngritur ndaj tij procedim penal për disa vepra, përfshirë: tentativë vrasjeje në seri, mbajtje dhe posedim të paligjshëm armësh brenda gjykatës, si dhe shkelje të tjera që lidhen me armë, municione dhe prishje të funksionimit të shërbimeve publike.
Avokati i tij, Vasilis Noulezas, ka deklaruar se klienti i tij nuk kishte qëllim të dëmtonte askënd, por se veprimet e tij ishin rezultat i dëshpërimit dhe zhgënjimit të gjatë për një konflikt të vazhdueshëm me autoritetet e sigurimeve shoqërore.
Sipas mbrojtjes, i moshuari pretendon se është trajtuar padrejtësisht nga EFKA dhe se përpjekjet e tij për drejtësi nuk kanë gjetur zgjidhje, duke e shtyrë drejt një veprimi ekstrem.
