Të nëntë personat e arrestuar si përgjegjës për një nga skemat më të mëdha të evazionit fiskal me kompaninë “Bankers Petroleum”, mbetën në qeli. Vendimi u dha këtë të shtunë nga Gjykata e Fierit, në një seancë maratonë prej 8 orësh.
Operacioni i ndërmarrë me urgjencë nga prokuroria e Fierit gjatë kësaj jave çoi në arrestimin e disa zyrtarëve të kompanisë, përfshirë drejtorin ekzekutiv të saj, shtetasin kinez Hongping Xiao, dhe ish-drejtorin Leonidha Çobo, të cilët do të qëndrojnë në masën shtrënguese arrest në burg.
Sipas organit të akuzës për 20 vjet më radhë, “Bankers Petroleum” ka raportuar humbje të vazhdueshme, pavarësisht të ardhurave të mëdha nga shitjet dhe eksportet e naftës bruto, me qëllim të përfitonte nga skemat e rimbursimit të TVSH-së.
Sipas Prokurorisë së Fierit, përgjatë dy dekadave shoqëria ka realizuar shitje me vlerë rreth 532 miliardë lekë, por ka deklaruar shpenzime të fryra, duke raportuar humbje prej mbi 11.7 miliardë lekësh në total.
Kjo ka rezultuar në mospagimin e tatim-fitimit për dy dekada dhe, njëkohësisht, në përfitime të padrejta përmes rimbursimeve të TVSH-së, duke shkaktuar një dëm të madh prej miliona eurosh në buxhetin e shtetit.
Hetimet, të cilat kanë zgjatur për rreth 6 muaj dhe janë kryer në bashkëpunim me Drejtorinë e Hetimit Tatimor bënë ndërhyrje emergjente në kompani për shkak të rrezikut të prishjes së provave apo të largimit të mundshëm.
Kur hetuesit tatimorë dhe oficerët e policisë gjyqësore ushtruan kontrolle në ambientet e Bankers Petroleum u perballen me rezistencën e punonjësve, ndaj u desh hyrja me forcë. Megjithatë hetuesit arritën të vënë nën sekuestro serverat e brendshëm të kompanisë dhe dokumente me vlerë për procedimin.
Në total Prokuroria e Fierit lëshoi 14 fletëarreste për pesë akuza. Ndaj tyre dhe personave të tjerë rëndojnë akuza të rënda si: falsifikimi i dokumenteve tatimore, fshehja e të ardhurave, pastrimi i parave, dhe shpërdorimi i detyrës.
