President i SHBA-ve, Donald Trump ka patur një bisede telefonike me kreun e Kremlinit, Vladimir Putin për të negoicuar për përfundimin e luftës.
Ndërsa u pyet nga media amerikane New York Post se sa herë ka patur diskutime mes tyre, ai refuzoi të jepte një përgjigje por la të kuptohej se presidenti rus ishte i ineteresuar për marrëveshje.
“Vladimir Putin nuk do të shohë njerëz që vdesin apo që vuajnë prej luftës. Njerëz të rinj e të bukur kanë humbur jetën, 2 milionë prej tyre pa asnjë arsye”, tha Trump.
Kreu i shtëpisë së Bardhë përsëriti edhe njëherë se nëse ai do të ishte në pushtet në vitin 2022, lufta nuk do të kishte ndodhur kurrë.
“Unë kam pasur gjithmonë mardhënie të mirë me Vladimir Putin. Biden ishte një turp për kombin tonë”, tha ai.
Donald Trump theksoi se ka një plan konkret për t’i dhënë fund konfliktit.
“Shpresoj të jetë shpejt. Çdo ditë njerëzit po vdesin. Kjo luftë është kaq e keqe në Ukrainë. Unë dua t’i jap fund kësaj gjëje të mallkuar”, theksoi Trump.
Ndërkohë nga ana tjetër më herët presidenti Volodymyr Zelensky është shprehur në rrjetet sociale se sipas tij Putin nuk po përgatitet për negociata, por për vazhdimin e luftës.
“Raportet e inteligjencës konfirmojnë se Rusia po krijon divizione të reja dhe po zhvillon objekte të reja të prodhimit ushtarak. Bashkëpunimi me Korenë e Veriut do të vazhdojë të zgjerohet. Moska po përhap gjithashtu teknologji moderne të luftës në rajon, veçanërisht teknologjitë e dronëve.Kjo do të thotë që Putini nuk po përgatitet për negociata, jo për paqe, por për vazhdimin e luftës dhe jo vetëm kundër Ukrainës. Tani ata po zgjerojnë ushtrinë e tyre me më shumë se njëqind mijë ushtarë. Të gjithë partnerët duhet të jenë të vetëdijshëm për këtë dhe ta shohin qartë”, tha Zelensky.
Në 24 shkur mbushen tre vjet nga fillimi i agresionit rus ndaj Ukrainës./vizionplus.tv
