Kuvendi i Shqipërisë gjatë seancës së sotme plenare po diskuton projekt ligjin mbi anulimin e gjobave për ndërtimet pa leje në zonat rurale.
PS është e vendosur ta miratojë sot, pasi kjo është seanca e fundit plenare për këtë vit.
Seanca është shoqëruar me tensione mes opozitës dhe mazhorancës.
“Keni krijuar artificialisht një furtunë në gotë. Të nderuar kolegë opozitarë na vjen keq, ne atë nismë që kemi diskutuar gjatë me qytetarët sot do ta bëjmë ligj dhe sot ato masa administrative të vendosura në mënyrë jo proporcionale do të anulohen doni apo s’doni ju” tha deputeti socialist Toni Gogu.
Nga ana e tij kreu i grupit parlamentar të PD-së, Gazment Bardhi akuzoi kryeparlamentaren Elisa Spiropali se po shkelte Kushtetutën duke e futur në rend dite projektligjin për faljen e gjobave, duke mos respektuar afatet.
“Nuk ka asnjë ligj të datës 4 dhjetor që i është shpërndarë deputetëve të Shqipërisë, ai projektligj që i është shpërndarë deputetëve është projektligji me propozues deputetin Erion Braçe me datë 5 dhjetor. Edhe sikur të ishte dorëzuar në datën 4 nuk mund të shqyrtohej nga komisionet pa kaluar dy javë nga regjistrimi i tyre. Ky është detyrim nga pika 3 e nenit 69 të rregullores së Kuvendit”, tha Bardhi.
