Dy këshilltarë bashkiak të Shkodrës që përfaqësonin grupimin e Lulzim Bashës, të dalë nga zgjedhjet vendore të 14 Majit 2023, i janë bashkuar PD zyrtare, të drejtuar nga Sali Berisha.
Imeldi Sokoli dhe Gloria Shllaku kanë theksuar në qëndrimet e tyre se ky hapi i ndërmarrë vjen si mesazh bashkimi në prag të zgjedhjeve të 2025, prandaj kanë ftuar që nën këtë frymë të veprojnë të gjithë demokratët. Duhet të jemi të bashkuar kunder kesaj qeverie, ishte mesazhi i tyre.
Me këtë lëvizje, grupi i Lulzim Bashës mbetet në këshillin bashkiak të Shkodres me vetëm 3 këshilltarë duke humbur të drejtën për të qënë grupim, ndërsa PD e Berishës shkon në 15 këshilltarë.
“Eshtë momenti që demokratët të mos ja lejojnë më vetës seksionimin e opozitës sepse kjo rezulton në jetëgjatësi të pushtetit të Ramës. Nga ana tjetër a ka vend për kritikë nga kampi opozitar po vend për kritika ka plot kryesisht me menyrën bërit politikë e ‘one man shoë’ në këtë kontekst të krijuarit e një alternative politike përbashkuese ku mbështetet në altruizëm dhe shpirt skuadre do të rrezultonte e suksesshme për opozitën.
Alternativa e opozitës duhet të përfaqsojë njerëzit dhe problematikat e popullatës dhe këto dyja duhet të jenë të lidhura ngushtësisht me njëra-tjetrën në mënyrë që njerëzve tu rikthehet besimi në politikë dhe se vendi mund të ndryshojë për mirë.
Ndaj aksioni opozitar duhet të mbështetet në përbashkim në çdo instancë po ashtu në Këshillin Bashkiak të bashkisë Shkodër ku unë jam pjesë, duhet të kemi 1 kamp të vetëm opozitar në këtë mënyrë kjo sjellë një administrim më të përgjegjshëm të Shkodrës”, thuhet në reagimin e Imeldi Sokolit.
Nga ana tjetër, Gloria Shllaku shprehet se opozita duhet të unifikohet në mënyrë që rezultati zgjedhor të jetë i duhuri.
“Por sot, më shumë se kurrë, ndiej një shqetësim të thellë: Pse Partia Demokratike është në një udhëkryq? Çfarë po e pengon që të jetë alternativa e fortë dhe shpresëdhënëse për shqiptarët?
Përgjigjja është e thjeshtë: mungesa e unitetit dhe interesat personale na kanë larguar nga idealet e përbashkëta që dikur na bashkonin.
Ne nuk duhet të harrojmë që dikur ishim një forcë e fuqishme, një familje që luftonte për të ardhmen e vendit. Sot, është koha të rifitojmë atë shpirt, të rilindim dhe të ndërtojmë së bashku një Shqipëri ku çdo qytetar ndjen shpresë për nesër.
Për ata që ndihen të zhgënjyer, për ata që kanë humbur besimin në politikë, për ata që nuk votojnë më: unë ju them se angazhimi i secilit prej nesh është çelësi. Ne nuk mund të lejojmë që pesimizmi të na mbysë; të mos harrojmë se e ardhmja është në duart tona. Vetëm me pjesëmarrjen e te gjitheve ne se bashku mund të ndryshojmë realitetin.
Unë, si nje ish kryetare e një grupseksioni të rëndësishëm dhe si Këshilltare Bashkiake e Shkodrës, kam marrë besimin e qytetarëve dhe gjithmonë kam punuar për të përmbushur nevojat e komunitetit.
Që nga sot e tutje, çdo iniciativë do të jetë e përbashkët, duke filluar me Këshillin Bashkiak të Shkodrës dhe duke vazhduar në nivele të tjera. Kështu, do të formojmë një zë të fuqishëm për ju dhe për një Shqipëri që meriton shumë më tepër”, shkruan ajo./vizionplus.tv
