Që nga fillimi i luftës në Gaza, ushtarët izraelitë dhe agjentët e inteligjencës kanë përdorur shpesh palestinezët si “mburoja njerëzore”, pretendon sot një artikull zbulues i New York Times. Sipas hetimeve të gazetës amerikane, të burgosurit janë detyruar në 12 muajt e fundit të marrin pjesë në misione dhe operacione të tjera të rrezikshme për jetën e tyre, me qëllim mbrojtjen e oficerëve të IDF.
Megjithëse shtrirja dhe shkalla e këtyre operacioneve mbetet e panjohur, kjo praktikë (e paligjshme sipas ligjit izraelit dhe ndërkombëtar) është përdorur nga të paktën 11 toga në pesë qytete të Gazës, ndonjëherë duke përfshirë oficerë të inteligjencës izraelite.
Lexo edhe :
Një shembull i cituar në botim është historia e Mohammed Shubeir, një 17-vjeçar i cili u ndalua nga ushtria izraelite për rreth 10 ditë në fillim të marsit. Shubeir u detyrua disa herë, deri në lirimin e tij, të ecte i prangosur nëpër rrënojat e qytetit të tij të lindjes, Khan Younis, duke kërkuar eksplozivët që mund të ishin vendosur nga Hamasi. Ai përshkruan se si ushtarët e detyruan dikur të kontrollonte në një ndërtesë të montuar me eksploziv dhe ai ndjeu se ato momente do të ishin të fundit për të.
Sipas hetimit të gazetës, të burgosurit janë përdorur në muajt e fundit nga ushtarët izraelitë për misione shumë të rrezikshme, të tilla si eksplorimi i tuneleve të Hamasit, kërkimi i eksplozivëve në ndërtesat e bllokuara ose trajtimi i objekteve që dyshohet se përmbajnë bomba.
Megjithëse IDF deklaron zyrtarisht se përdorimi i të burgosurve si mburoja njerëzore është rreptësisht i ndaluar, Times foli me ushtarët izraelitë të cilët i përshkruan misionet e zbulimit që përfshijnë palestinezë si një praktikë të përhapur, të kryer me miratimin e komandantëve të lartë ushtarakë.
Shumë nga ushtarët që folën për gazetën në kushte anonimiteti shprehën pakënaqësinë e tyre për këtë fenomen, duke shpjeguar se kjo ishte ajo që i shtyu ata të thyenin heshtjen. Sipas dëshmive, kur u tentua t’i shprehte eprorëve të tyre mospajtimin e disa ushtarëve, disa komandantë u përpoqën ta justifikonin praktikën duke thënë se të burgosurit ishin terroristë dhe jo civilë. Megjithatë, shumica prej tyre pas një kohe u liruan, pa u ngritur akuza ndaj tyre.
Artikulli i NYT përmend gjithashtu historinë e Bashir al-Dalou, një farmacisti nga qyteti i Gazës, i cili u arrestua më 13 nëntor në shtëpinë e tij. 43-vjeçari ishte larguar nga shtëpia katër javë më parë me familjen e tij, por ishte kthyer atë ditë për të marrë disa gjëra.
Pasi ushtarët izraelitë e arrestuan dhe e morën në pyetje për aktivitetet e Hamasit në zonë, ai u urdhërua të zhvishej dhe të qëndronte me të brendshme. Më pas ai u prangos, i lidhën sytë dhe e çuan në një shtëpi të rrënuar 5-katëshe, ku kishin frikë se mund të kishte bomba të Shtetit Islamik ose një tunel të fshehur .
U urdhërua të hynte në oborr dhe ta kërkonte duke lëvizur sende me këmbë. Në dëshminë e tij, 43-vjeçari përshkruan se si 3 ushtarë e shtynë me forcë përpara dhe më pas qëndruan në një vend të sigurt ndërsa ai eksploronte rrënojat zbathur, duke rezultuar në lëndime nga xhamat e thyer.
Së fundi, vlen të theksohet se, në hetimin e saj, Times nuk gjeti asnjë provë se ndonjë i burgosur palestinez ishte plagosur ose vrarë ndërsa përdorej si mburojë njerëzore./vizionplus.tv
