Sot është 5 maji, Dita e Dëshmorëve. Në këtë ditë kujtohen dhe nderohen trimat që luftuan për Shqipërinë e lirë. Presidenti i Partisë së Lirisë, Ilir Meta, ka zhvilluar homazhe në Varrezat e Dëshmorëve. Kreu i PL shkruan se dita e sotme është ditë reflektimi, sidomos për të rinjtë dhe të rejat që mëritojnë sipas tij, të jetojnë të lire dhe me dinjitet në Atdhe.
“Në këtë ditë të shenjtë të 5 Majit u përula me nderimin dhe respektin më të thellë para veprës së lavdishme dhe kujtimit të paharruar të Dëshmorëve dhe Heronjve të Atdheut, që derdhën gjakun dhe dhanë jetën për Lirinë dhe Sovranitetin e Shqipërisë!
Sot është një ditë reflektimi dhe angazhimi për një të ardhme më të mirë për të gjithë shqiptarët, e sidomos për të rinjtë dhe të rejat e Shqipërisë, që meritojnë të jetojnë të lirë dhe me dinjitet në Atdheun e tyre me 4 milion shqiptarë plus.
Një urim të veçantë për veteranët dhe familjet e tyre që trashëgojnë brez pas brezi vlerat e Luftës Antifashiste”, shkruan Meta krahas një videoje të postuar në Facebook.
Ndërsa në një prononcim për mediat pas kryerjes së homazheve, Meta u shpreh se kjo ditë na kujton gjakun që është derdhur për çlirimin e Shqipërisë. Ai thotë se liria e ka çmimin shumë të shtrenjtë dhe duhet bërë çdo gjë për ta mbrojtur.
“Kjo ditë na kujton sa gjak është derdhur për çlirimin dhe lirimin e Shqipërisë. Në këtë ditë që na kujton se liria e ka çmimin shumë të shtrenjtë dhe duhet bërë çdo sakrificë për të mbrojtur dhe për ta merituar atë.
Jemi këtu sepse besojmë te shenjtëria e gjakut të dëshmorëve. Besoj shumë te Atdheu, dhe Atdheu na duhet të jetojmë të lirë dhe të mos harrojmë që themeluesit e kësaj force politike 20 vite më parë, krijuan një forcë të re politike. Kjo forcë politike duhet t’i dalë zot vendit dhe mbi të gjitha atdheut. Ndaj kemi në fokus 5 prioritete kryesore për 4 milionë shqiptarë”, tha Meta./vizionplus.tv
