Kryeministri Edi Rana ka përsëritur thirrjen e tij ndaj qytetarëve për të mos iu rikthyer figurave së të shkuarës politike. Këtë herë nga Mati, Rama ka shigjetuar kundërshtarët duke thënë se nuk mund të votohet dikush që ka marrë peng një forcë politike për interesat e tij.
“Bashkitë ishin të rrënuar edhe ato që drejtoheshin nga Partia Socialiste. Ata nuk kanë pasur asnjë sens të zhvillimit të qyteteve dhe komuniteteve.
E pakonceptueshme që ka akoma njerëz, njerëz të ndershëm të cilët i japin besim, i japin votë.
Është e rëndësishme për ata që njerëz që në emër të së shkuarës vazhdojnë ta mbajnë veten peng, të reflektojnë për këtë gjë.
Gjithë ata që kanë përfaqësuar atë të djathtë, do të rrotullohen në varr kur nipërit dhe mbesat do të shkojnë të japin votën e tyre për një forcë që aleatët tanë i kanë vendosur kryq.
Nuk mund t’i jepet vota një force që është marrë peng nga një njeri i vetëm, që kërkon ta përdorë atë për veten e tij.
Lëreni mbrapa, atë që është i dënuar të mbetet mbrapa dhe të ecim vetëm përpara”, tha Rama.
Nga ana tjetër, kryeministri kërkoi votëbesim për kandidatin e tij për Matin, Agron Malaj, për të cilin tha se do t’i shërbejë komunitetit, ndryshe nga çfarë do bënin kundërshtarët.
“Këtu vota në 14 maj kërkohet për të pastruar, për të ndërtuar rrugë, për të ndriçuar rrugët, për arsim cilësor, për të pasur ndërmarrje që i shërbejnë komunitetit, dhe jo për të futur njerëz në autobus.
Ju mendoni që do vijnë ata dhe do e mbajnë pastër qytetin? Si do e mbajnë pastër ata kur s’kanë mbajtur pastër asnjë qytet pastër, ja ku keni Shkodrën.
Kjo është e vetmja fushatë që nuk flitet për ujin pijshëm, jo se nuk ka pika për të punuar, por pjesa më e madhe e vendit ka ujë të pijshëm 24 orë”, tha ai.
As në Mat, nuk munguan batutat e kryesocialistit Rama lidhur me votën e grave dhe burrave
“Një fjalë kam për gratë e Matit, atë që i kanë burrat të djathtë, t’i marrin përdore në “14 Maj” dhe të votojnë për përpara.
Pse e mbështesin gratë më shumë PS seç e mbështesin burrat, sepse gratë kanë tendencën të shohin ku është puna.
Do t’ju rrotullohen gjyshërit në varr, e do ju thonë ‘çfarë na bërë o çun që votove “Like Floririn”, sepse ai që doni të riktheni ju i ka humb edhe emri”, shprehu Rama.
Agron Malaj nga Partia Socialiste ka përballë më 14 maj, Admir Sinamatin nga koalicioni “Bashkë Fitojmë” në garën për Bashkinë e Matit.
