Kryetarja e AIDSSH-së, Gentiana Sula, raportoi të enjten e 3 Qershorit në Kuvend për veprimtarinë e institucionit gjatë vitit 2020.
E ftuar në “Spotlight” për të diskutuar më gjerësisht për raportin dhe jo vetëm, Kryetarja e Autoritetit për Informimin mbi Dokumentet e ish-Sigurimit të Shtetit u përplas me deputetin Adriatik Alimadhi sa i përket dosjeve “Vip”, të cilat u përkasin politkanëve apo zyrtarëve që vijojnë të ushtrojnë detyrën.
Sula është shprehur se kërkon që vetëdeklarimi të përfshihet në Reformën Zgjedhore për të penalizuar kështu mashtrimin. E nga ana tjetër, deputeti Alimadhi mendon se kjo nuk është asgjë tjetër veçse një tjetër grackë e politikës.
Gentiana Sula: Ajo që themi ne është që të përfshihet në Reformën Zgjedhore si vetëdeklarim dhe të penalizohet mashtrimi me vetëdeklarim. Dhe kjo është praktika edhe në Bullgari, edhe në Gjermani… vetëdeklarimi është, se nuk ke kohë.
Adriatik Alimadhi: Unë them se është një grackë më shumë e politkës në të cilën i lejon këto subjekte që janë të kriminalizuara të depërtojnë derisa marrin mandatin, qofshin këta këshilltarë vendorë apo qofshin deputetë dhe rastet kanë treguar që këta e kanë marrë mandatin. Dhe pastaj iu është hequr mandati. Kurse unë them, ligji është i ftohtë në vetvete.
