Kryeministri Edi Rama ka lajmëruar se shumë shpejt linjës së fluturimeve “Air Albania” do t’i shtohet edhe Naimi. Kjo linjë sqaroi Rama do të kryejë fluturime drejt Veronës, Bergamos dhe Pisës dhe do të jetë gati në 29 mars. Rama shtoi në “Facebook” se pas Naimit do të vijë edhe Noli, që do të jetë një linjë fluturimi drejt Amerikës.
“Ja edhe Naimi po vjen pas Lasgushit e Migjenit, siç jua kam thënë duke marrë mbrapsht shumë nënqeshje e përqeshje, po s’ka gjë, pak nga pak do ta mësojnë edhe nënqeshësit e përqeshësit se unë them atë që bëj dhe bëj atë që them. Tani po ju them pas Naimit vjen Fishta dhe mirëpres me buzëqeshje çdo nënqeshje e përqeshje. (Se mos thotë ndonjëri që e kam harruar Nolin jo, gabon, por Nolit i duhet zgjatja e pistës sepse do të bëjë Amerikën prandaj më duhet ta mbyll me atë fjalën magjike, që aq shumë inat e kanë shumë miq këtu: Durim)”
Momentalisht linjat që mbajnë flamurin shqiptar janë Migjeni që mbulon linjat e Romës, Milanos dhe Bolonjës në Itali dhe Lasgushi që mbulon Stambollin.
