Ish-kryetari i grupit parlamentar të LSI-së, Petrit Vasili, përmes një deklarate për mediat ka akuzuar qeverinë për mos hapjen e negociatave të anëtarësimit me BE.
Në fjalën e tij Vasili është shprehur se në Shqipëri për shkak të qeverisjes së saj të gjithë fenomenet negative janë rënduar siç është krimi, korrupsioni, krimi zgjedhor etj.
“Integrimi europian është prioritet madhor, nuk është pronë e qeverive sikurse do ta trajtojë Edi Rama dhe Rilindja e tij. Sigurisht këto lajme të hidhura që vijnë dhe ky integrim i bllokuar është e qartë dhe ne, po nga kjo foltore kemi denoncuar. Këto janë lajme të mira për qeverinë, sepse një qeveri që ka axhenda të tjera antieuropiane sigurisht nuk e gëzon ecjen përpara të integrimit europian, por e gëzon shumë kur lajmet për bllokimin e integrimit europian të Shqipërisë vijnë vazhdimisht. Pasi qeveria shqiptare, kthimi në prioritet madhor, mobilizimin e të gjithë energjive më pozitive, për pjesëmarrjen e të gjithë aktorëve politikë, opozitë, mazhoranca, shoqëri civile, njerëz të dijes, njerëz të shkencës, njerëz me ide. Integrimi është një prioritet madhor, është prioritet profesional në radhë të parë. Është prioritet politik. Nuk kërkonte zhbërje ministrish siç ishte Ministria e Integrimit, kërkonte specialistët më të mirë që të ishin deri në front. Çdo ministri shqiptare të kishte kryefjalën e saj vetëm integrimin europian .”
