Duket se diplomacia amerikane po përqendrohet në Lindjen e Mesme me fokus Iranin dhe luftën kundër ISIS, pavarësisht vendimit të Donald Trump për tërheqjen e trupave nga Siria. Sekretari amerikan I Shtetit Mike Pompeo nisi këtë të martë një turne disa ditor në Egjipt, Bahrein, Emiratet e Bashkuara Arabe, Katar, Arabi Saudite, Oman dhe Kuvajt.
Pompeo do të diskutojë për situatën në Siri, përkushtimin e SHBA-se ndaj rajonit për të mundur Shtetin Islamik dhe për t’iu kundërvënë atyre që ai i cilësoi si “aktivitete destabilizuese të Iranit.”
Nga ana tjetër, këshilltari i presidentit për Sigurinë Kombëtare, John Bolton gjatë një vizite në Turqi njoftoi se administrata e Presidentit Trump nuk do t’i tërheqë forcat amerikane nga Siria veriore deri kur Turqia të japë garanci se nuk do të godasë forcat kurde, të mbështetura nga SHBA dhe deri kur mbetjet e fundit të Shtetit Islamik të jenë mposhtur.
Edhe pse ishte parashikuar se do të takohej me presidentin turk Recep Tayyip Erdogan, një gjë e tillë nuk ndodhi.
Gjatë një fjalimi para ligjvënësve në Ankara, presidenti turk u kundërpërgjigj në distancë duke thënë se këshilltari për SIgurinë i Trump bëri një gabim serioz.
Erdogan nënvizoi se Turqia kurrë nuk do të pajtohet me një kompromis që do të mbronte milicinë kurde.
