Raportimi vjetor i Komisionerit Shtetëror të Zgjedhjeve, Ilirjan Celibashi u kthye në një debat mes mazhorancës dhe opozitës për standartet e zgjedhjeve në Shqipëri. Megjithatë shqetësimet e demokratëve dhe ato të socialistëve ishin krejt të ndryshme e pa asnjë pikë takimi. Opozita i sheh problemet e procesit para se vota të hidhet në kuti, dhe nënkryetari i PD Oerd Bylykbashi vuri në dukje se shteti dhe krimi duhet ta dalin jashtë zgjedhjeve. Bylykbashi i cili është drejtues politik në qarkun e Durrësit, solli eksperiencën e tij në zgjedhjet e 11 majit dhe problemet që sipas tij janë më të mprehta.
“Prezenca e grupeve kriminale në vendumërime, gjatë numërimit që prodhon presion mbi numëruesit ishte e tillë që unë ua kam thënë atëhere me gjysëm shakaje, por ishte e vërtetë; nëse dikush gabonte e fuste dorën brenda xhaketës, aty mund të ishte një pistoletë. Kjo ishte situata. Pra cfarë mund të bëjmë që ta nxjerrim shtetin nga zgjedhjet dhe krimin nga zgjedhjet”, tha Oerd Bylykbashi, anëtar i Komisionit të Ligjeve, PD
Por socialistët u fokusuan tek procesi pasi vota hidhet në kuti. Gjiknuri propozoi që të zgjerohet votimi dhe numërimi elektronik për të shmangur procesin e zgjatur të nxjerrjes së rezultatit.
“Unë inkurajoj që teknologjia e votimit e numërimit në zgjedhje të implementohet në sa më shumë qendra votimi në Republikën e Shqipërisë”, deklaroi Damian Gjiknuri.
Ndërkohë që Ulsi Manja deklaroi se nëse nuk aplikohet votimi e numërimi elektronik, atëhere të rikthehet numërimi në qendër votimi.
“Atëhere duhet të shkojmë tek 5225 qendrat e votimit, votim e numërim aty dhe del rezultati për 2 orë”, u shpreh Ulsi Manja, kryetar i Komisionit të Ligjeve, PS
Të mërkurën do të mblidhet Komisioni i Posacëm i Reformës Zgjedhore i cili do të diskutojë me drejtuesin e SPAK-ut rreth problematikës së zgjedhjeve dhe rrugëve për të përmirësuar standartet.
