Kryeministrja italiane, Giorgia Meloni i është përgjigjur sulmit të presidentit të SHBA Donald Trump pasi tha përmes një postimi në Truth Social se ajo po përpiqej të rregullonte marrëdhëniet me të për arsye politike.
Në reagimin e saj, Meloni i cilëson “të pakuptimta” dhe “të paprovokuara” sulmet e përsëritura nga Trump, duke theksuar se popullariteti i saj në Itali nuk lidhet me marrëdhëniet personale që ka me presidentin amerikan.
“President Trump, këto sulme të vazhdueshme dhe të paprovokuara janë të pakuptimta. Sa i përket popullaritetit tim, të qenit mikesha juaj sigurisht që nuk e ka ndihmuar, as nuk varet nga marrëdhënia ime me ju. Popullariteti im varet nga aftësia ime për të mbrojtur interesin kombëtar të Italisë, dhe kjo është pikërisht ajo që kam bërë gjithmonë”, shkroi Meloni, duke komentuar postimin me sulmin e ri të presidentit amerikan në mediat sociale.
Sipas saj, përdorimi i bazave rregullohet nga marrëveshje të mëparshme që Italia i ka respektuar gjithmonë, dhe që nuk mund të shkelen për sa kohë ajo është në detyrë. Meloni thekson gjithashtu se Italia mbetet një shtet sovran dhe vendimet e saj merren në bazë të interesit kombëtar.
“Kjo është ajo që bëra edhe në lidhje me bazat ushtarake amerikane në Itali. Përdorimi i tyre rregullohet nga marrëveshjet që ne gjithmonë i kemi respektuar dhe të cilat nuk mund të shkelen për sa kohë që unë jam Kryeministre. Italia mbetet një komb sovran. Sidoqoftë, popullariteti im nuk është puna juaj. Ju sugjeroj të përqendroheni tek i juaji.”, shtoi ajo.
