Nikoll Radaçi, shoferi që shkaktoi aksidentin tragjik në Durrës, do të qëndrojë në burg.
Ai doli këtë të martë para trupit gjykues për masën e sigurisë, ndërsa Gjykata e Durrësit vendosi ta lërë në qeli, pasi dëgjoi palët.
Gjatë seancës, Nikoll Radaçi qëndroi i heshtur dhe kokëulur, duke mos bërë asnjë koment.
Aksidenti fatal ndodhi pasditen e të dielës në lagjen nr. 15, ku 57-vjeçari, duke drejtuar mjetin në gjendje të dehur dhe me shpejtësi tej normave, përplasi për vdekje dy të mitur të moshës 9 dhe 12 vjeçare që ishin duke luajtur në trotuar.
Së bashku me ta ishte edhe një 8-vjeçar, i cili u plagos rëndë, ndërsa aktualisht ndodhet në spitalin e Traumës në Tiranë, në gjendje të stabilizuar shëndetësore. Sipas mjekëve, ai e ka kaluar rrezikun për jetën.
Nikoll Radaçi akuzohet për tri vepra penale: “Shkelja e rregullave të qarkullimit rrugor”, me pasojë vdekjen e dy personave, “Drejtimi i automjetit në mënyrë të parregullt” (në gjendje të dehur) dhe “Largimi nga vendi i aksidentit”.
