Kryeministri Edi Rama, Presidenti Bajram Begaj dhe ministri Ermal Nufi zhvilluan homazhe në Varrezat e Dëshmorëve, për të nderuar ata që sakrifikuan jetën për atdheun. Ata vendosën lule pranë monumentit Nënë Shqipëri, duke shprehur respekt për veprën e të rënëve.
Dita e Dëshmorëve e ka origjinën më 5 maj 1942, kur u vra Qemal Stafa, i cili u bë simbol i rezistencës antifashiste. Çdo vit, në këtë datë, drejtuesit më të lartë të shtetit kryejnë homazhe për të përkujtuar dëshmorët.
Tradita e nderimit të të rënëve është e hershme, edhe para krijimit të shtetit shqiptar, kujtimi i tyre ruhej përmes këngëve epike dhe trashëgimisë gojore. Megjithatë, deri pas Luftës së Dytë Botërore nuk kishte një status të mirëfilltë ligjor për dëshmorët.
Pas çlirimit, në vitin 1945, u miratua një ligj për mbështetjen e familjeve të dëshmorëve dhe invalidëve të luftës, duke përfshirë edhe ata që kishin rënë më herët për lirinë e vendit. Në vitet ’60, ky status u zgjerua dhe u përcaktua më qartë termi “Dëshmor i Atdheut”, ndërsa në të gjithë vendin u ndërtuan varreza përkujtimore.
Pas ndryshimeve politike të viteve 1990, statusi pësoi rishikime të tjera. Në vitin 2000 u miratua ligji “Statusi i Dëshmorit të Atdheut”, i cili përfshin dëshmorët e të gjitha periudhave historike, përfshirë edhe ata të rënë në vitet 1997–1999 dhe në luftën për çlirimin e Kosovës./vizionplus.tv
