Një tjetër fazë e operacionit ndërkombëtar “The Wanted” është finalizuar me sukses, duke çuar në arrestimin e të shumëkërkuarit shqiptar Ervin Mata.
Sipas njoftimit zyrtar, Mata u kap në Brazil, pas një bashkëpunimi të ngushtë mes Interpol Tirana dhe Interpol Brasilia, në kuadër të shkëmbimit të informacionit në kohë reale.
Lexo edhe :
Related Posts
Sipas autoriteteve, 39-vjeçari akuzohet se ka koordinuar pjesëtarët e një grupi të strukturuar kriminal për trafikimin e 240 kilogramëve kokainë, në një operacion të zhvilluar më 29 shtator 2020.
Ai fshihej në Brazil, duke përdorur dokumente identifikimi angleze, të falsifikuara.
Hetimet për këtë grup kriminal janë zhvilluar nga SPAK në vitin 2023, në bashkëpunim me EUROJUST, EUROPOL dhe agjencitë ligjzbatuese të disa shteteve, përfshirë Belgjikën, Francën, Holandën, Gjermaninë, Brazilin dhe Kolumbinë. Grupi kishte veprimtari në Shqipëri, Amerikën e Jugut dhe në disa vende të Europës.
NJOFTIMI:
Si rezultat i shkëmbimit dhe koordinimit të informacioneve, në kohë reale, ndërmjet specialistëve të Drejtorisë së Interpolit dhe homologëve të Interpol Brasilias, në kuadër të operacionit ndërkombëtar të koduar “The Wanted”, u kap në Brazil, shtetasi shqiptar, i shpallur në kërkim ndërkombëtar, E. M., 39 vjeç.
Gjykata e Posaçme e Shkallës së Parë për Korrupsionin dhe Krimin e Organizuar, në vitin 2023, i ka caktuar këtij shtetasi, masën e sigurisë “Arrest në burg”, për veprat penale “Trafikimi i lëndëve narkotike”, kryer në kuadër të grupit të strukturuar kriminal, dhe “Kryerja e veprave penale nga organizata kriminale dhe grupi i strukturuar kriminal”.
Në vitin 2023, gjatë një procedimi të regjistruar nga SPAK, janë kryer hetime, në bashkëpunim me EUROJUST, EUROPOL dhe me agjencitë ligjzbatuese belge, franceze, holandeze, gjermane, braziliane dhe kolumbiane, lidhur me disa shtetas shqiptarë të përfshirë në veprimtari kriminale në Shqipëri, Amerikën e Jugut dhe në disa shtete europiane.
Gjithashtu hetime janë kryer dhe në lidhje me disa ngjarje kriminale të mëparshme, të ndodhura në Shqipëri.
Në kuadër të këtij procedimi, shtetasi E. M. dyshohet se ka koordinuar bashkëpunëtoret e tij, për trafikimin e 240 kg lëndë narkotike Kokainë, më datë 29.09.2020.
39-vjeçari u kap në qytetin e Ilha Bela, dhe kishte në përdorim dokumente identifikimi angleze, të falsifikuara.
Interpol Tirana vijon të bashkëpunojë me Interpol Brasilia, për të finalizuar procedurën për ekstradimin e shtetasit E. M., në Shqipëri.
/vizionplus.tv
