Kjo foto tregon momentin kur dy persona qëllojnë, njëri me kallashnikov e tjetri me pistoletë në drejtim të Jualian Sulës.
Atentati ndodhi të martën në kryqëzimin midis spitalit dhe stadiumit të Lushnjës.
Në fare pak sekonda, Julian Sula, i njohur ndryshe si Juli i Pashakos, është gjendur nën breshëritë e plumbave, teksa ishte i vetëm në makinën e tij.
Sipas policisë, atentatorët dolën nga makina ndërsa një i tretë ndodhej në timon.
Ata mbanin maskë të zezë në fytyrë dhe kapele. Sapo panë makinën “BMW” të zezë të Julian Sulës që hyri në rrugë ata zbritën gjuajtën me breshëri.
Por duket se një vonesë e tyre në pritë bëri që Julian Sula të kalonte me shpejtësi para tyre. Duket 45-vjeçari i pa atentatorët duke i dhënë shpejtësi makinës e duke i shpëtuar mrekullisht plumbave.
Atentati zgjati vetëm 10 sekonda. 6 plumba përfunduan në makinën e Sulës ndërsa një plumb e preku në këmbë.
Pas kësaj autorët dogjën makinën se bashku me armët në fshatin Lifaj.
Nga ekspertiza paraprake e policisë makina bashkë me targat rezultojnë të vjedhura dy vite më parë në Greqi.
Pistat që po hetohen janë disa, duke nisur nga e kaluara e Julian Sulës në vitin 1997 e deri më sot, si dhe lidhjet e tij me trafikun e narkotikëve, ndërsa policia shoqëroi të paktën 25 persona.
Vetë Sula apo siç njihet ndryshe Juli i Pashakos nuk pranoi të japë asnjë detaj nga ngjarja para uniformave blu.
Prej 2 vitesh, Sula lëvizte lirshëm në Lushnje madje edhe në këmbë. I njohur si kundërshtar i Aldo Bares, drejtues i një tjetër grupi kriminal në Lushnjë, atij i është bërë edhe më herët atentat.
Emri i tij është përmendur edhe në masakrën e Lushnjës ku mbetën të vrarë, Jurgen Hoxha dhe Zamir Latifi ndërsa dy të tjerë u plagosën. Dyshohet se personi i tretë që ishte në makinë me Laert Haxhiun dhe Orges Bilbilin ishte pikërisht Julian Sula.
