Vijon bojkoti i studentëve në Korçë, vendimi pas votimit në Këshillin Studentor
Bojkoti i mësimit në Universitetin “Fan S. Noli” në Korçë pritet të vijojë, pasi shumica e studentëve pjesëmarrës në votim janë shprehur në favor të tij.
Sipas të dhënave nga votimi, 610 studentë kanë votuar pro vijimit të bojkotit, ndërsa 325 janë shprehur kundër dhe në favor të zhvillimit të mësimit.
Në bazë të këtij rezultati, Këshilli Studentor ka vendosur të mbështesë vijimin e bojkotit, duke iu referuar vullnetit të shumicës së studentëve që morën pjesë në votim.
Ndërkohë, studentët që kërkojnë vijimin e procesit mësimor pritet t’u komunikojnë pedagogëve qëndrimin e tyre. Kjo situatë lë të hapur mundësinë që në ditët në vijim të ketë qëndrime të ndryshme mes studentëve lidhur me zhvillimin e mësimit.
Rezultati i votimit pritet t’u bëhet i ditur edhe pedagogëve, ndërsa vijon të mbetet e paqartë se si do të organizohet procesi mësimor në ditët në vijim.
Bojkoti në Universitetin “Fan S. Noli” vijon në kuadër të protestës studentore, ndërsa vendimi i shumicës së votuesve tregon se kërkesa për vazhdimin e tij mbetet e fortë.
