Në raportin e Bankës Europiane për Rindërtim dhe Zhvillim thuhet se ekonomia shqiptare parashikohet të bjerë me -9%, që është më e thella në rajon dhe në gjithë vendet në zhvillim pjesë e BERZH.
Presidenti Ilir Meta ka reaguar pas këtij raporti duke kërkuar që të punohet më seriozisht për mbështetjen e aktivitetit aktual dhe për tejkalimin e krizës strukturore të ekonomisë.
Ai shprehet se modeli ekonomik duhet të mbështetet në diversifikimin e ekonomisë për të ulur riskun e krizave dhe për të siguruar një zhvillim ekonomik të qëndrueshëm.
“Paralajmërimet e fundit të BERZH dhe të institucioneve të tjera ndërkombëtare për uljen e rritjes ekonomike të Shqipërisë, janë jo vetëm shqetësuese në një plan afatshkurtër, por dhe tregojnë krizën e thellë strukturore të ekonomisë sonë. Ndaj duhet të punohet seriozisht për të mbështetur aktivitetet ekonomike aktuale, por dhe të mendohet për të tejkaluar krizën strukturore duke rishikuar modelin ekonomik.”
Kreu i shtetit bën thirrje që të shfrytëzohen kapacitetet potenciale të vendit për të rritur “prodhimin e energjisë, vlerën e burimeve minerale dhe natyrore nëpërmjet përpunimit të tyre, prodhimin industrial dhe për të shumëfishuar prodhimin bujqësor dhe atë agro-industrial”.
Sipas tij, çdo politikë ekonomike dhe investimesh duhet të garantojë mbrojtjen e mjedisit si dhe domosdoshmëri për fuqizimin e turizmit në mënyrë afatgjatë dhe me vizion.
“Zgjerimi i kapaciteteve portuale, i rrjetit të transportit, si dhe i transmetimit të energjisë është potencialisht një mundësi tjetër për të shfrytëzuar avantazhin tonë gjeografik rajonal.”
