Qeveria shqiptare po hyn në fazat përfundimtare të përpilimit të listës së reformave që do të mbështeten nga Struktura e Planit të Rritjes – nisma e re prej 6 miliardë Euro e prezantuar nga Komisioni Europian në nëntor 2023.
Në këtë kuadër, palët e interesuara, përfaqësues të BE-së dhe institucioneve rajonale e kombëtare morën pjesë në tryezën e rrumbullakët “Tregu i përbashkët rajonal dhe reformat e vendit në Planin e ri të Rritjes”, organizuar nga Instituti për Bashkëpunim dhe Zhvillim (CDI) në kuadër të serisë së aktiviteteve pranverore për Procesin e Berlinit, mbështetur nga Zyra e Jashtme Federale Gjermane.
Përparimi në bashkëpunimin rajonal, në zbatimin e Tregut të Përbashkët Rajonal dhe në miratimin e acquis në Tregun e Vetëm të BE-së janë midis komponentëve kryesorë të Planit të Rritjes. Ambasadori i Gjermanisë në Shqipëri, SH.T.Z. Karl Bergner deklaroi: “Qeveria gjermane mbështet plotësisht objektivat e Planit të Rritjes, në veçanti sunimin për të sjellë vendet e Ballkanit Perëndimor më pranë tregut të brendshëm të BE-së dhe gjithashtu më pranë pranimit.
Ne e shohim Procesin e Berlinit dhe Planin e Rritjes si plotësues të njëri-tjetrit dhe një koordinim i mirë midis Komisionit, Këshillit të Bashkëpunimit Rajonal dhe Procesit të Berlinit është kyç për suksesin e tij.” Plani i Rritjes është nën procedurën trialoge dhe pritet marrja e një vendimi brenda prillit 2024 deklaroi André Rizzo, i Ngarkuari me Punë i Delegacionit të BE-së në Shqipëri.
“Është një lajm i mirë që tashmë ka një zotërim domethënës të Planit të Rritjes në rajon. – deklaroi Z. Rizzo. – Komisioni Europian vlerëson se Plani i Rritjes është i aftë të kontribuojë për të pasur një efekt transformues në ekonomitë e rajonit, me kusht që të përmbushen plotësisht reformat sipas Planit.”
Drejtori i Përgjithshëm i Drejtorisë së Politikave dhe Integrimit në BE në Zyrën e Kryeministrit, z. Adrian Kamenica njoftoi se lista e reformave që do të dorëzohen në Komision është gati, tryezat e rrumbullakëta informuese me partnerët socialë janë planifikuar të organizohen duke filluar nga java e ardhshme dhe se qeveria synon që axhendat e reformave të miratohen zyrtarisht deri në fund të majit 2024.
Më tej, ai shtoi se Plani do të ketë nevojë për kapacitete të zgjeruara njerëzore dhe për asistencë në institucionet e përfshira. Pasi vlerësoi kontributin e Procesit të Berlinit dhe të Planit të Rritjes për gjithëpërfshirje, kryetarja e Komitetit të Çështjeve Europiane dhe e Këshillit Kombëtar për Integrimin Europian, znj. Jorida Tabaku nënvizoi nevojën për përfshirje të hershme të Parlamentit në Planin e Rritjes.
Ajo deklaroi: “Pjesëmarrja e hershme e Parlamentit është vendimtare për të çuar përpara diskutimet kombëtare dhe reformat si dhe axhendat legjislative. Mekanizmat tanë parlamentarë të integrimit në BE janë të hapur për aktorët socialë që kontribuojnë në këtë proces.”
Znj. Pranvera Kastrati, nga Këshilli i Bashkëpunimit Rajonal (RCC), theksoi se është e rëndësishme që ekonomitë e Ballkanit Perëndimor të përputhen me acquis përkatës të BE-së dhe me standardet e praktikave më të mira.
“Plani i Rritjes ofron mbështetje në mbylljen e hendekut të konvergjencës midis BE-së dhe Ballkanit Perëndimor, duke mbështetur përputhjen e standardeve dhe praktikave me BE-në” – shtoi ajo.
#BerlinProcess10 Z. Ionut Sibian, Raportues për Opinionin e Komitetit Ekonomik dhe Social Europian (KESE) mbi Planin e Rritjes, solli në vëmendje rolin e Komiteteve të Monitorimit që bazohen në mekanizmin e Planit të Rimëkëmbjes dhe Elasticitetit, dhe kontributin e aktorëve socialë. Opinioni i KESE thekson nevojën për të harmonizuar mekanizmin e Strukturës së Planit të Rritjes me parimet dhe qeverisjen e kohezionit të BE-së.
Znj. Liucija Andriekené, Anëtare Raportuese e Gjykatës Europiane të Audituesve, vuri në fokus nevojën për vlerësimin e ndikimit si të IPA III ashtu edhe të Planit të ardhshëm të Rritjes. Rekomandimet kryesore përfshijnë nevojën që Komisioni të jetë në gjendje të rishikojë listën e reformave; nevojën për të siguruar qëndrueshmërinë e reformave, më shumë saktësi në përcaktimin e kritereve të “përmbushjes së kënaqshme” etj.
Mbështetur nga Zyra e Jashtme Federale Gjermane, CDI vazhdon kontributin e saj për një proces gjithpërfshirës të hartimit të politikave, dhe në rritjen e angazhimit të qytetarëve dhe mbështetjes shoqërore ndaj bashkëpunimit rajonal.
Në këtë kuadër, CDI po zbaton projektin “Kanalizimi i kontributit të shoqërisë civile në Europën Juglindore 6 në Tregun e Përbashkët Rajonal”.
