Roger Federer e ka një ëndërr dhe ajo është të luajë përkrah Rafael Nadalit në një turne “double”. Kampioni zviceran i tenisit e deklaroi këtë gjatë përurimit të Laver Cup në Pragë të Çekisë. Në këtë turne, që starton për herë të parë në shtator të këtij viti, Bjonr Borg do të drejtojë përfaqësuesen Evropiane ndërsa John McEnroe atë të pjesës tjetër të Botës. Gjithsej, në tre ditë, do ketë 12 ndeshje, prej të cilave 9-të do jenë përballje teke dhe tre do jenë “double”.
Pikërisht ideja për të luajtur në një turne dyshe duket se e ka tunduar prej kohësh 35-vjecarin zviceran. Federer i cili mundi Nadalin në një finale epike 3-2 në Australian Openin e këtij viti, tha se gjithmonë kishte dashur të luante me spanjollin, kjo për faktin se rivaliteti me të përgjatë gjithë karrierës ka qenë special. “E kam pasur gjithmonë kundërshtar shërbimin e tij dhe për shkak të rivalitetit tonë shumë special, gjithmonë kam dashur që të luajë me Rafan” – tha Federer, i cili theksoi se në të kaluarën ka luajtur shumë pak turne dyshe, dhe përgjithësisht vetëm me tenistë zviceranë. Duhet thënë se ky turne i Laver Cup, është krijuar nga një bashkësi agjencish, ku njëra prej tyre është dhe kompania e Federerit.
Jorge Paulo Lemann është gjithashtu një nga sponsorët gjeneral, ndërsa në listën e yjeve që kanë konfirmuar pjesëmarrjen, përvec Federer dhe Nadal, është edhe Berdych. Ky turne starton më 22 shtator dhe organizatorët janë zotuar ta zhvillojnë çdo vit.
