Tenderi i kryer nga Ministria e Zhvillimit Ekonomik, mbi dhënin me koncesion të zonës teknologjikë në Spitallë të Durrësit, përfundon në Prokurori. Pas shpalljes së fituesit nga Komisioni i Vlerësimit të Ofertave, kompania e renditur padrejtësisht e dyta në garë, ka kallëzuar në organin e akuzës, vendimin e marrë. Kompania pjesëmarrëse i ka argumentuar Prokurorisë se Komisioni i Vlerësimit të Ofertave ka marrë dy herë vendim për të shtyrë afatin e shpalljes së fituesit.
Në fakt, ligji parashikon se afati i shpalljes së vendimit, mund të shtyhet vetëm për arsye të veçanta, por në të dyja rastet, komisioni nuk ka argumentuar asnjë arsye të rëndësishme. Sipas të dhënave, e vetmja arsye zyrtare është dokumentacioni voluminoz. Por ky argument nuk është arsye për të shkelur ligjin nga anëtarët e komisionit, ndaj Prokuroria pritet të hetojë ata, me akuzën e shpërdorimit të detyrës. Të gjithë këta zyrtare duket se kanë patur një arsye kryesore në shtyrjen pa limit të shpalljes së fituesit: t’i krijojnë avantazhe dhe privilegje kompanisë që doli fituese.
Konsorciumi, që u shpall fitues, “Pelikani Shpk”, “Vëllezërit Hysa” dhe kompania “Best Construction”, do të investojnë në këtë zonë 53 milionë euro më pak se kompania tjetër pjesëmarrëse në garë. Ai do të zhvillojë zonën e Spitallës nëpërmjet industrisë së rëndë, një fakt ky, i cili bie ndesh me mjedisin përreth, pasi zona turistike është vetëm 2 kilometer larg.
Nga ana tjetër, fituesi parashikon të hapë 2500 vende të reja pune, ndërsa kompania e dyta në garë parashikon 12 mijë të tilla. Të gjitha këto avantazhe të shpërfillura nga këta anëtarë të komisionit, lidhen me një fakt: Të mbështesin konsorciumin fitues, pas të cilit fshihen njerëz me pushtet, që duan të zhvatin çdo pasuri publike, kundrejt investimeve qesharake dhe aspak cilësore për komunitetin. Por këto llogari, tashme anëtarët e komisionit, do t’i japin tek organi i akuzës, i cili pritet të hedh dritë mbi këtë aferë korruptive.
